Mirush Kula dhe Sami Lame janë dy shqiptarët e dënuar në Angli për kultivim lënde narkotike, pasi ishin përfshirë në fenomenin e shtëpive të barit. Sipas mediave, në më pak se dy vite më parë, ata ishin arrestuar për një rast të ngjashëm.
Kula dhe Lame ishin të pranishëm në godinë kur policia, bastisi banesën në qytezën Consett, më 24 mars, raportojnë mediat britanike. Gjykatësi i Durhamit tha se Lame u gjet i fshehur në papafingo, ku po dridhej kur policia e ndaloi.
Prokurori i çështjes tha se policia gjeti 248 bimë kanabisi që vlerësohet se do të prodhonin 21 kilogramë hashash që nëse shitej me doza të vogla do të gjeneronte nga 70,000 deri në 210,000 £ në vlerat e shitjes në rrugë. Gjykatësi i çështjes tha se të dy luanin një rol “të rëndësishme” në rritjen e kanabisit dhe prisnin të merrnin shpërblim financiar.
Për Kulën u tha se kishte si funksion kujdesin për bimët duke ujitur ato dhe nuk kishte asnjë rol “operativ ose menaxhues” në operacion. Avokati tha se i pandehuri, i cili nuk di të lexojë apo të shkruajë, ka qenë në Mbretërinë e Bashkuar ilegalisht për dy vitet e fundit, pasi ka ardhur këtu në një përpjekje për të fituar para duke bërë punë riparimi në shtëpi ose duke punuar në ndërtim, për të siguruar fëmijët e tij dhe familjen në Shqipëri.
Gjykatësi tha se Kula do përballet me dëbimin nga Anglia pas lirimit nga qelia, ndërsa Lame do të duhet të presë rezultatin e shqyrtimit të kërkesës së tij për statusin e tij të azilit.
Discussion about this post