Në radhët e zyrtarëve që abuzojnë në kurriz të detyrës për mbrojtjen e shtetit, është shtuar edhe një oficer i SHÇBA-së. Bëhet fjalë për specialistin e identifikuar me iniciale S.M i cili në Shqipëri bënte “një sy qorr e një vesh shurdh” për policët që shkelnin ligjin ndërsa vetë ishte nën hetim nga autoritetet gjermane për drogë. Zyrtari S.M është përjashtuar pak ditë më parë nga detyra.
Sipas burimeve të sigurta, për specialistin në fjalë autoritetet gjermane kishin lëshuar më herët edhe një urdhër ndalimi. Për këtë rast drejtori i shërbimit, Muhamet Rrumbullaku, nuk ka dhënë asnjë përgjigje. Ndërsa theksojmë se një ditë më parë ky institucion njoftoi zyrtarisht se kishte rënë pre e një sulmi kibernetik në serverin qendror të institucionit, por burime të sigurta për gijotina.com bëjnë me dije se ngjarja ka ndodhur 8 ditë më parë dhe është mbajtur larg syrit të publikut.
SHÇBA thotë se sulmi është parandaluar, megjithatë risku mbetet i lartë që informacione sensitive për policinë që shkelin ligjin apo bashkëpunojnë me krimin të kenë përfunduar në duar të pasigurta.
