Kreu i ARRSH-së Ervis Berberi nxiton të marrë para për tendera, a thua sikur qeveria do të bjerë nesër ose do të ndodhë ndonjë apokalips. Këtë herë, Berberi do të qethë 3 miliardë lekë për ndërtimin dhe mobilimin e një godine. Madje pa pritur që ndërtesa të ngrihet, shpall edhe një tender tjetër gjigant për tekonologjinë që do të vendoset aty. Bëhet fjalë për tenderin me numër reference REF-44866-10-07-2022 dhe objekt “Ndërtim i Godinës së Qendrës së monitorimit të trafikut”. Vetëm për ndërtimin e kësaj godine, e cila do të monitorojë trafikun nga kamerat, Berberi afron 205,543,896.21 lekë nga fondet buxhetore. Gara për këtë tender do të mbyllet pas një jave dhe fituesi do të ketë afat 1 vit për të ngritur godinën.
Tenderi i dytë
Paralelisht me tenderin e mësipërm, zhvillohet i ndarë një prokurim tjetër për të njëjtin objekt.! Kjo godinë do të jetë pika qendrore e projektit të ri “Qendra Monitorimit e Trafikut”, e cila sipas dokumenteve do të shtojë kontrollin në 13 segmente. Konkretisht, kjo qendër do të shtrijë shërbimin e saj në akset; Tiranë – Durrës, Tiranë – Elbasan, Durrës – Plazh, Durrës – Kavajë, Kavajë – Rrogozhinë, Rrogozhinë – Lushnje, Lushnje – Fier, Fier – Vlorë, Vorë – Ahmetaq. Për këtë projekt do të nevojiten punonjës të rinj, që sigurisht do të paguhen nga buxheti i shtetit, të paktën kështu theksohet në dokumentet e tenderit me numër reference REF-45168-10-10-2022 dhe objekt “Qendra e monitorimit të trafikut (200 km) Faza e Parë”
Ndërsa më tutje citohet se, për vënien në funksion të kësaj Qendre fillimisht do të shpenzohen 2,285,280,226.24 lekë, ose 22 milionë euro më TVSH. Kështu përcakton tenderi gara për të cilin pritet të hapet në 14 nëntor 2022. Punimet për vendosjen e teknonologjisë do të zgjasin 2 vjet dhe synojnë që të përmirësojë sigurinë në trafik dhe reduktimin e aksidenteve. Pra, nga të dhënat e deri më tanishme vërejmë se në total, vetëm gjatë muajit nëntor do të jepen për Qendrën e Monitorimit të Trafikut 25 milionë euro.
Kostot e këtyre dy prokurimeve janë vetëm shpenzimet fillestare, se më pas vazhdimi i punimeve në këtë qendër do kërkojë më tepër fonde. Në dokumentet e tenderit evidentohet se kjo do jetë një qendër thirrjesh 24 orë në 7 ditë të javës dhe një pikë kombëtare aksesi të të dhënave. “Qendra e re e propozuar do të ndërtohet brenda territorit të Drejtorisë Rajonale të ARRSH-së Tiranë. QKMT do të presë qendrën e kontrollit për harduerin e nevojshëm për të zbatuar të gjitha funksionet e nevojshme të sistemit RTMCS, duke përdorur një re private të bazuar në 3 nyje, në bashkëpunim me Ministrinë e Brendshme dhe AKSHI”, thuhet në këto dokumente. Ku theksohet më tutje se parashikohet punësimi i 306 personave për shërbimet në këtë qendër.
Për këtë pikë nuk është përcaktuar vlera e parashikuar që do të shpenzohet, por më tutje është përcaktuar se sa para do të hidhen në këtë qendër deri në vitin 2023, për secilin vit përkatës. Konkretisht, për këtë vi do të merren 50,000,000 lekë nga buxheti i shtetit për këtë qendër. Fondi buxhetor për vitin 2023 është parashikuar 57,000,000 lekë, ndërsa fondi buxhetor për vitin 2024 është parashikuar 83,000,000 lekë.
Pra, Berberi po siguron para, me atë rast bënë edhe propagandë, në prag të zgjedhjeve lokale që do të mbahen në vitin 2023. Mirë bën që nxiton, se asnjëherë nuk i dihet çfarë ndodh deri në zgjedhje!/ Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post