Trajneri i Vllaznisë, Tomas Bërdariç është rrëfyer për revistën gjermane “Kicker” duke u ndalur gjatë tek objektivat e shkodranëve, gara për titull, infrastuktura apo sistemi VAR.
“Shikoni, futbolli në Shqipëri është dominuar nga skuadrat nga kryeqyteti, Dinamo që tani është rikthyer në Superligë, Partizani dhe Tirana. Nga këto skuadra na ndajnë vetëm 1 orë e 30 minuta me makinë, duam të jemi aty në luftën për titull mes skuadrave më të mira.
Kampionati është bërë më i bukur dhe rivalizues. Terrenet janë duke u përmirësuar dhe disa prej tyre janë të nivelit europian. Për shembull, “Air Albania” është fantastik, një stadium madhështor, aty do të zhvillohet edhe finalja e Konferencë Ligës. Dhe për mbarëvajtjen e mirë të ndeshjeve tani do të jetë dhe VAR i cili do t’u vijë në ndihmë arbitrave dhe skuadrave për të marrë atë çfarë meritojnë në fushë.
Gjithçka është e hapur. Këtu është një sfidë e madhe për mua që të kushton shumë energji, aq më tepër kur gjithçka e bën pothuajse i vetëm. Deri vonë nuk kishte as trajner atletike dhe videoanalisti filmoi njëherë me “iPhone”-in e tij”, shprehet trajneri Bërdariç.
