Kreu i Partisë Demokratike, Sali Berisha, ka akuzuar kryeministrin Edi Rama për mbyllje të çështjeve hetimore të tij dhe Belinda Ballukut.
Në fjalën e tij në mbledhjen e Grupit Parlamentar, Berisha u shpreh se Rama ka tentuar të mbyllë afera që sipas tij arrijnë në 1.2 miliardë euro.
Ai theksoi se situata kërkon reagim qytetar, duke bërë thirrje për protesta si mjetin e vetëm për të ndalur atë që e quajti “një e keqe e madhe” për vendin.
“Rama mendoi se mbylli afera te tij që shkojnë 1.2 mld të tij me Lubi Ballukun. E vërteta është që pas 3 muajsh ai i mbylli dyert përfundimisht organit të akuzës. E mbylli dosjen e tij me Ballukun, e mbylli me prokurorët. Pavarësisht se një seri vendesh të BE kërkuan që prokuroria e vendit të mos pengohej në funksionimin e saj. Sot ai mendon dhe ndihet më i fortë se kurrë, bazuar në aktet kriminale që ka marrë, prandaj sot beteja jonë është më jetike se kurrë në këtë vend. Në ndërgjegjen e cdo shqiptari duhet të jetë e qartë thellë se rruga e vetme për të ndaluar këtë të keqe të madhe është protesta. Rama nxori veten mbi ligjin, nuk pyet më për kushtetutë, as për partnerët tanë ndërkombëtare. Në këto kushte ne do ngrihemi edhe më fuqishëm, ky është misioni ynë. Ky mision sot është më i rëndësishëm se në cdo kohë. Nuk mund të mbyllë kurrsesi afera që i kanë kushtuar miliarda qytetarëve shqiptarë”, deklaroi lideri i opozitës.
Berisha deklaroi se përgjigjja ndaj mburojës që kryeministri i ka bërë vjedhjeve janë vetëm protestat, datën e të cilës tha se do ta njoftojë shumë shpejt.
“Të përgatitemi për kryengritjen e radhës më të fuqishme që ka njohur Shqipëria, për t‘i treguar atij se kurrë nuk pajtohemi ne me këtë veprimtari. Duhet të ngrihemi në emër edhe të atyre shqiptarëve që nuk ngrihen dot nga frika. Kështu është, historinë e bëjnë guximtaret, ndaj kryengritja tjetër duhet të jetë më e fuqishme. Kjo duhet të jetë përgjigjja jonë ndaj dhunës shtazore që përdori Rama në 17 prill. Kjo duhet të jetë përgjigjja ndaj mburojës së vjedhjes së tij. Ne nuk pajtohemi kurrë, ndaj pas kësaj mbledhje fillojmë përgatitjet për protestën e ardhshme, datën e të cilës do ta shpallim shumë shpejt”, tha Berisha.
Discussion about this post