Nga Foltorja e Lezhës, lideri historik demokrat, Sali Berisha, citoi sondazhin e djeshëm të publikuar në një nga mediat, që tregonte rënie drastike të besimit të shqiptarëve te reforma në drejtësi.
Ai tha se 75% të shqiptarëve nuk i besojnë reformës së George Soros, pasi sipas tij ka realizuar kapjen e drejtësisë nga Edi Rama.
“75% të shqiptarëve nuk i besojnë reformës së George Soros, sepse ajo ka realizuar kapjen e drejtësisë nga Edi Rama. Kurrë ndonjëherë sistemi i drejtësisë nuk ka qenë siç është sot.
Çfarë solli reforma miqtë e mi? Ju mohoi ju, iu mohoi qytetarëve shqiptarë, procesin gjyqësor në gjykata. Procesi ligjor ka një kusht, ai duhet të ketë transparencë dhe duhet të kryhet brenda një kohe të caktuar. Sot janë 100 mijë dosje, 100 mijë qytetarë që presin drejtësi. Do të duhen 20 vite për t’u shqyrtuar. Mijëra e mijëra prej tyre ndoshta nuk u premton jeta që të marrin drejtësi” – tha Berisha.
Sipas Berishës, njeriu që u shpall kampion për Reformën në Drejtësi është Ardian Dvorani, edhe pse kishte fshehur 82 mijë euro.
“Njeriu që u shpall kampion botëror i anti-korrupsionit është Ardian Dvorani. Mes të tjerash, përveçse kishte fshehur 82 mijë euro, i harrova tha ky Dvorani i partisë, i porosit Albtelekomi një apartament. Si e shpërbleu Dvorani Albtelekomin? 9 vendime gjykate dha në favor të Albtelekomit ku ishte në trupin gjykues” – tha Berisha.
