Kryetari i Partisë Demokratike, Sali Berisha, ka lëshuar akuza të forta kundër kryeministrit Edi Rama dhe strukturave shtetërore, duke e cilësuar rastin e zhdukjes dhe rishfaqjes së ish-zv.drejtorit të AKSHI-t, Daniel Shima, si një akt të “terrorizmit shtetëror”.
Sipas Berishës, Daniel Shima ndodhet “në qendër të një cikloni interesash nga më mafiozet”. Në një deklaratë nga selia blu, Berisha akuzoi AKSHI-n si “sipërmarrje private” të Ramës, ku tenderat milionësh dyshohet se përcaktohen nga kunati i Linda Ramës, Armand Fangu. Berisha përmendi regjistrime ambientale që tregojnë një bisedë mes Gerond Meçes, fituesit të tenderave me vlerë 46 milionë euro, dhe një personi tjetër, ku pretendohet se tenderat shpërndahen me ndërhyrjen e palëve të lartpërmendura.
Për Berishën, mesazhi i Shimës “Po më arrestojnë” tregon përfshirjen e strukturave të uniformuara, duke ngritur dyshime të forta se ai u mbajt peng për disa orë në një “bodrum mafioz”.
Berisha theksoi se heshtja e Shimës pas kthimit dëshmon një “kod mafioz”, duke deklaruar se ish-zyrtari është kërcënuar me vrasje nëse flet për aferat e AKSHI-t. Ai bëri një krahasim me rastet e Lefter Kokës dhe Erion Veliajt, të cilët, sipas tij, mbahen të heshtur nga persona si Elvis Doçi me kërcënime të ngjashme.
“Hape gojën po deshe, e ka plumbin mas veshi ai,” tha Berisha, duke treguar bindjen e tij se Shima u kërcënua drejtpërdrejt. Ai i drejtoi Ramës katër pyetje publike, duke e akuzuar për kapjen e shtetit dhe duke e cilësuar Shqipërinë si “narkoshtetin e parë në Europë”.
Discussion about this post