Ish-kryeministri Sali Berisha ka reaguar me tone të ashpra lidhur me vrasjen e gjyqtarit Astrit Kalaja në sallën e Gjykatës së Apelit. Ai akuzon kryeministrin Edi Rama se po e shfrytëzon ngjarjen tragjike për të promovuar ndryshime ligjore që ai i quan “Kodi i narkodiktaturës”.
“Rama po përdor gjakun dhe jetën e një gjyqtari për të kaluar kodin e narkodiktaturës,” deklaroi Berisha në një fjalim publik.
Sipas tij, vrasja nuk do të ishte ndodhur nëse pushteti të kishte marrë masat minimale të sigurisë, përfshirë përdorimin e detektorëve, kontrolleve në hyrje, dhe ruajtjen fizike të gjyqtarëve në sallat e gjyqit.
Berisha theksoi se pretendimet e ministrave se fajin e ka Kodi Penal ose arma pa leje janë të papranueshme dhe një përpjekje për të shmangur përgjegjësinë.
Ai akuzoi gjithashtu se drejtësia shqiptare është në një situatë katastrofale, me proceset gjyqësore që zgjasin deri në 15 vjet, duke privuar qytetarët nga një proces ligjor i drejtë.
“Ky kod lejon dënimin përjetë. Çfarë kërkon nga një kod tjetër ti?” – tha Berisha, duke iu referuar ligjeve të reja që sipas tij Rama po përpiqet t’i miratojë.
Berisha përsëriti se vrasja e gjyqtarit nuk është vetëm një akt kriminal, por edhe një shfaqje e mungesës së përgjegjësisë shtetërore dhe shprehje e një sistemi që ai e përshkruan si të instaluar dhe të pamëshirshëm — një narkoshtet.
Discussion about this post