Një deklaratë e Kuvendit të Shqipërisë në emër të Kryeparlamentares Lindita Nikolla ka zbuluar, ndoshta pa dashje, se kë njeh numri 2 i shtetit, për Parti Demokratike.
E ndërsa në Kuvend mazhoranca e Kryeministrit Edi Rama vijon lojrat lidhur me atë se cili është kryetar i Grupit Parlamentar të PD-së, Gazment Bardhi apo Lulzim Basha (ose një i mandatuar prej tij), duket se si subjekt Partia Demokratike, Lindita Nikolla njeh grupimin e drejtuar nga Lulzim Basha.
Edhe pse gjyqësori shqiptar prej të paktën dy vitesh mban zvarrë çështjen, duke mos dhënë një vendim se kush është kryetari i PD-së, pasi ka tre palë që i janë drejtuar Gjykatës, Nikolla përmes një deklarate të publikuar në faqen zyrtare të Kuvendit, e konsideron PD-së e drejtuar nga Sali Berisha si Foltore.
“Deklarata e sotme e Foltores është e mbushur me të pavërteta e sajime, të cilat nuk i përgjigjen realitetit. Shpenzimet për të cilat bëhet fjalë në deklaratën e Foltores janë shpenzime për funksionimin e Kuvendit të Shqipërisë dhe aspak për shpenzime luksi.
Në ato që Deklarata e Foltores i quan shpenzime luksi, zëri kryesor, 829.700.000 lekë, janë pagat e deputetëve dhe të administratës. Mos vallë nuk duhet të paguhen deputetët dhe administrata?
Në ato që Deklarata e Foltores i quan shpenzime luksi, bëjnë pjesë shpenzimet operative, 479.556.000 lekë, të domosdoshme për mbështetjen e veprimtarive parlamentare dhe kryerjen e funksioneve të Kuvendit. Mos vallë duhet të ndërpritet veprimtaria e Kuvendit të Shqipërisë?
Në ato që Deklarata e Foltores i quan shpenzime luksi, bëjnë pjesë shpenzimet për udhëtime jashtë vendit të delegacioneve të Kuvendit, 58.391.411 lekë, në kuadër të detyrimeve për të marrë pjesë dhe kontribuar në veprimtaritë e forumeve ndërkombëtare ku jemi anëtarë”, thuhet në reagimin zyrtar të Kuvendit që drejtohet nga Lindita Nikolla, e cila vijon lojën me atë se kë njeh mazhoranca e Edi Ramës për opozitë, apo se kujt i takon emërtesa “Partia Demokratike”.
Nuk dihet nëse ky është një lapsus, por përmendja disa herë e emërtimit “Foltore” duket se është qëndrimi që Nikolla si Kryeparlamentare ka për PD-në e drejtuar nga Berisha.
Ish-Kryeministri nuk ka regjistruar asnjë subjek politik në Gjykatë, ndërsa “Foltore” ai konsideroi turin e takimeve që nisi përpara se të zhvillonte Kuvendin e Rithemelimit të PD-së. Nuk dihet se nga e ka nxjerrë Nikolla e Kuvendit këtë emërtim, aq më tepër në një deklaratë të publikuar në faqen zyrtare të Kuvendit të Shqipërisë.
Dhe nisur nga kjo deklaratë zyrtare e Kuvendit në emër të Lindita Nikollës shpjegohet edhe fakti sepse zyrtarisht Parlamenti nuk njeh Gazment Bardhin si Kryetarin e Grupit Parlamentar, edhe pse shumica e deputetëve të PD-së e kanë mandatuar atë në këtë funskion. Kjo shpjegon më tej sepse Kuvendi i drejtuar nga Lindita Nikolla nuk pranon të ndryshojë përbërjen e Komisionit të Posaçëm të Reformës Zgjedhore, duke zëvendësuar emrin e Enkelejd Alibeajt si bashkëkryetar me atë të Oerd Bylykbashit, apo pse Kuvendi nuk pranon kërkesat e paraqitura nga Grupi i deputetëve të PD-së të drejtuar nga Gazment Bardhi për ngritjen e komisioneve hetimore.
Ndoshta kjo është arsyeja që një grup deputetësh që janë atashuar në grupimin e Lulzim Bashës atakojnë çdo aksion opozitar në sallën e Kuvendit dhe disa prej tyre luajnë rolin plotësuesit të numrave në Komisionet Parlamentare sa herë mazhorancës u duhet kuorumi për të zhvilluar mbledhjen.
Discussion about this post