Në takimin që po zhvillon në Shkodër, ish-kryeministri Sali Berisha ka folur edhe për nismën “Open Balkan”. I prerë ai ka thënë se çdo herë po tregohet qartë që kjo është një nismë e influencuar nga Rusia dhe Serbia, që ndër shekuj synojnë të “përpijnë” Ballkanin.
“Evropa pati një projekt dhe ky ishte projekt i Berlinit. Përputhej me interesin tonë kombëtar. Me Vuçiçin shpikën Ballkanin e Hapur i cili s’është gjë tjetër veçse influencë e plotë e Serbisë në Rajon. Por e vërteta është dhe e Rusisë. Në shekull dy kanë qenë ambiciet kryesore ruse, Adriatiku dhe Dardanelet. Kjo është e vërteta. Por ne ku jemi? Ne jemi të rreshtuar me Beogradin. A është ky interesi ynë? Duhet të biem dakord, për një komb të qytetëruar që ruan pasionin e lirisë së tij, asgjë nuk ka më të rëndësishme se interesi kombëtar”, u shpreh Berisha.
Sakaq, ai hodhi një sërë akuzash ndaj Ramës, duke thënë se me këtë nismë po na largon më shumë nga BE. Ndërsa përmendi këtu Ramiz Alian, Berisha tha se Rama po vepron po njësoj dhe po e mban Shqipërinë peng.
“Ky shkon në Bruksel me Ballkanin e Hapur në çantë dhe na deklaron se nëse këta nuk do marrin vendim të hapin negociatat me ne, atëherë ne do shohim drejtimin tonë. Njëlloj si etërit e tij, juve ju kujtohet. Në vitin ’90 Ramiz Alia, jo thoshte se nuk jemi as një lindje as në perëndim. Ky thotë unë do pyes atë anketën që mbush në zyrat e PS se çfarë drejtimi të marrim. Ky (Rama) mendon se mund të luajë me fatin tonë. Por Shqipëria nuk është e tij dhe ne i themi mos tento sepse nuk do mundesh të shkelmosh interesin kombëtar”, u shpreh Berisha.
Discussion about this post