E fortë ishte deklarata e ish-kryeministrit Sali Berisha kur gjatë “Foltores” në Tiranë tha se Lulzim Basha i mohoi Belind Këlliçit të ishte pjesë e parlamentit në 2017 se e shikonte si rrezik potencial për t’i zënë vendin.
“Unë do të them dy fjalë sot këtu, Belind Këlliçi iu ka përfaqësuar ju me dinjitetin më të madh, u ka qëndruar besnik ju, edhe në kohën kur iu bënë jashtë çdolloj konteksti padrejtësitë më të mëdha, edhe kur Belind Këlliçit iu mohua mundësia për t’ju përfaqësuar në parlament, jua them unë se ai pati frikë se e shikonte Këlliçin si rrezik potencial për t’i zënë vendin. Belind Këlliçi nuk u lëkund nga ju, qëndroi besnik”, tha Berisha.
Vetë Këlliçi e ka quajtur domosdoshmëri praninë e tij në Foltoren e Sali Berishës, e cila sipas tij ka në përbërje të saj të gjithë anëtarët e partisë.
“Dua të falenderoj çdo anëtar të forumit që në këto vite nuk ka lënë rrugicë pa trokitur për të kërkuar votën për PD, unë sot jam deputet falë jush, ju jam mirënjohës përjetë. Mandati im nuk është i përjetshëm. Unë as nuk mund ta mendoja që të mos isha sot pjesë e Foltores, do të ishte çmenduri që unë të kisha frikë për të thënë mendimin para anëtarëve të forumit”, u shpreh ai.
Më herët, Berisha sfidoi Bashën të marrë pjesë në debat, dhe shtoi se sillet njësoj sikur të ishte shkolluar në Korenë e Veriut dhe jo në Hollandë.
Discussion about this post