Jorida Tabaku dhe Dhurata Çupi janë dy deputetet e para të grupimit “kritik” ndaj Berishës të cilat kanë mbërritur në Kuvend ku pritet të nisë seanca e betimit të Bajram Begajt si president i Republikës së Shqipërisë.
Me anë të një reagimi, Rithemelimi konfirmoi sot se nuk do të jetë pjesë e seancës pasi e cilëson ditë fatkeqësie për demokracinë. Partia Demokratike duket se do të jetë e përçarë edhe në inaugurimin e Presidentit të ri. Gijotina.com raportoi dje se ‘grupi i Alibeaj’ do të marrë pjesë në seancë, ndërsa ‘Rithemelimi’ i Sali Berishës do të bojkotojë ceremoninë e betimit të kreut të ri të shtetit.
Vendimi i kreut të grupit parlamentar të PD-së, për të qenë të pranishëm, sipas burimeve nga PD, është marrë për të respektuar institucionin e presidencës, megjithëse bojkotuan votimin e tij më datë 4 qershor. Sipas Alibeajt, qëndrimi i tyre për Bajram Begajn është i qartë, ai përfaqëson zgjedhjen e njëanshme të mazhorancës, jo gjysmën e shqiptarëve.
Discussion about this post