Partia Demokratike do të dërgojë në Gjykatën Kushtetuese dekretin për ministren virtuale të Inteligjencës Artificiale “Diella” si dhe ndryshimet në Rregulloren e Parlamentit.
Kështu bëri të ditur në mbledhjen e grupit parlamentar të Partisë Demokratike, kreu i PD-së, Sali Berisha, i cili e cilësoi si “një akt të pashembullt” dekretin e Presidentit.
“Unë mendoj se të dy aktet që bënë, aktin e pashembullt të Presidentit të Republikës, i cili dekreton ministër virtual, inekzistent, duke fyer Kushtetutën, vendin dhe presidentin. Akt i pashembullt. Unë mendoj se, duhet ta nisim urgjentisht këtë dekret në Gjykatën Kushtetuese që të arkivohet në banesën e turpit të historisë. Njerëz të papërgjegjshëm për detyrën që kanë, të aftë të firmosin gjithçka”, tha Berisha.
Berisha u shpreh gjithashtu se ndryshimet e komisioneve parlamentare ishin krejtësisht të panevojshme dhe se shtojnë shpenzimet e taksapaguesve shqiptarë. Sipas Berishës, mazhoranca kishte vetëm një qëllim, që opozitës t’i hiqej Komisioni i Integrimit.
“Sikundër ne duhet të dërgojmë menjëherë në Gjykatën Kushtetuese me kërkesën dhe për pezullimin e vendimit të sotëm të miratimit të ndryshimeve të rregullores në të cilën janë shkelur parimet themelore të Kushtetutës, janë shkelur nenet e saj, germa dhe fryma e saj, është shkelur Rregullorja e Parlamentit. Kushtetuta dhe Rregullorja në sintoni të plotë parashikojnë si rrugë të vetme të ndryshimit të Rregullores së Kuvendit, afatin 1-javor, minimal.
Dhe këta e bënë në një afat 1-ditor. Përveç kësaj, Kushtetuta përcakton se asnjë nen, asnjë ligj me efekte financiare nuk mund të votohet pa u miratuar paraprakisht në Këshillin e Ministrave. Kalimi nga 8 në 11 komisione pa diskutim që shton shpenzimet për taksapaguesit shqiptarë dhe është krejtësisht i panevojshëm, kishte vetëm një qëllim, vetëm një qëllim që t’i hiqej opozitës Komisioni i Integrimit”, u shpreh Berisha.
Sipas Berishës, sa i përket procesit të integrimit, “mazhoranca është vite drite larg plotësimit të kritereve në çdo fushë, dhe këtu ata nuk mund t’ia linin opozitës të thoshte të vërtetat, qoftë Brukselit, qoftë komunitetit ndërkombëtar”.
Discussion about this post