“Do mbrojmë opozitën dhe pluralizmin me çdo çmim dhe çdo mënyrë”, u shpreh nga Lushnja, kreu demokrat Sali Berisha, ku zhvilloi një takim me simpatizantë dhe mbështetës të opozitës.
Berisha e cilësoi Edi Ramën si rrezikun më madhor që ka vendi, duke shtuar se opozita nuk do e ulë kokën përpara këtij rreziku.
“Do bëjmë betejën pa kthim në emër të demokracisë, të së ardhmes. Nuk ka gjë më të shëmtuar se opozita e shitur, se opozita e kontrolluar. Edi Rama sot ka humbur kontrollin e opozitës”, tha Berisha.
Ish-Kryeministri tha se në 2013 u largua pasi kishte menduar se kishte kryer misionin e tij.
“Ne vijmë sot në këtë takim pas 10 vitesh, një opozite drobitëse, pas 10 vitesh në të cilat ne demokratët kemi parë para syve tanë se si, Edi Rama shpërbëri arritjet 30 vjeçare të demokracisë.
Ne pamë, para syve në këto 10 vite se si vota jonë, vullneti ynë, humbi vlerën e vet. Ne pamë se si këto 10 vite lumenjtë e djersës, mundit të fermerëve, biznesmenëve, qytetarëve të Lushnjes, u shpërbënë, u dëmtuan.
Ne pamë se si këto 10 vite u krye një gjenocid i vërtetë në kuptimin e krijimit të kushteve për largimin nga vendi.
Ne pamë gjatë këtyre 10 viteve, se si ekonomitë e fermerëve shqiptarë u përgjysmuan, se si u adaptua një politike strikte, armiqësore. Mjafton të kujtoj këtu se në buxhetin e këtij viti, për fermerët që përbëjnë 40% të popullatës, parashikohen gjithsej 30 mln euro dhe prej atyre ju garantoj se të paktën 20 i futin në xhepa, qeveritarët dhe administratorët e tyre.
Nuk ka ndodhur ndonjëherë kurrë që nga themelimi i shtetit shqiptar, dhe më këtë nënkuptoj qeverinë e vendosur para Kongresit të Lushnjes, që fermerët e këtij vendi të kenë qenë më të braktisur.
Nuk ka ndodhur ndonjëherë kurrë që një qeveri të parashikojë për investim gjithsej 30 mln euro në të gjithë bujqësinë shqiptare”, tha Berisha.
Discussion about this post