Sikurse ish kryeministri Sali Berisha e paralajmëroi disa ditë më parë, një nga dy anijet të cilat janë marrë me qira nga qeveria për prodhimin e energjisë elektrike, ka mbërritur sot në Portin e Vlorës.
Anija speciale do të qëndrojë në spirancë përpara hyrjes së terminalit Vlora-1 (PIA) dhe do të shkarkojë një nga anijet gjeneratorë, të cilën e ka të ngarkuar sipër saj. Anija do të prodhojnë energji për nevojat e Shqipërisë deri në momentin që termocentrali i Vlorës të vihet në funksion.
Në prill të këtij vitit Ministrja e Energjisë dhe Infrastrukturës, Belinda Balluku njoftoi se Shqipëria do të merrte me qira dy anije që prodhojnë energji elektrike për një periudhë 2-vjeçare.
Pas këtij lajmi ka reaguar ashpër kreu i Partisë Demokratike, Sali Berisha i cili akuzoi qeverinë se ky po kryen një krim i rëndë mjedisor, pasi sipas tij dy “TEC-e” do të punojnë me D2, lëndë që ndot mjedisin. Sipas Berishës, këto anije ndotin vendin sa 100.000 makina që bëjnë 100 km në ditë.
Gjithashtu, Berisha tha se këto impiante do të vijnë nga Bangladeshi, kostoja e të cilave përllogaritet 760 milionë euro për dy vite.
Kujtojmë se në mars 2021, qeveria e Shqipërisë nënshkroi një marrëveshje bashkëpunimi me kompaninë amerikane ExxonMobil dhe Excelerate Energy për termocentralin e Vlorës, për të përdorur gazin e lëngshëm në prodhimin e energjisë elektrike. Dy anijet e marra me qira, pritet që të përmbushin 15% të kërkesës së vendit për energji.
Discussion about this post