Kryetari i Partisë Demokratike, Sali Berisha ka pranuar në konferencën e sotme për zgjedhjet vendore, se në këtë forcë politike ka pasur ndryshime pozitive, por sipas tij, nuk mjaftojnë për të fituar zgjedhjet e ardhshme lokale.
Gjatë fjalës së tij, Berisha u shpreh se primaret do t’i japin fund kryetarokracisë, teksa shtoi se duhet të ridimensionohet roli i grave në Partinë Demokratike, dhe në Shqipëri.
“Ata do zgjidhen nga anëtarët dhe mbështetësit tanë, i japin fund kryetarokracisë, si një rrugë e sigurt për të shmangur autokracinë, në parti dhe në vend në të ardhmen. Jemi sot opozitë e vërtetë, përballemi çdo ditë me qeverinë dhe kjo jo si qëllim në vetvete, por për të mbrojtur interesat e qytetarëve shqiptarë dhe për të shpalosur alternativën tonë. Të gjitha këto janë ndryshime shumë pozitive, por nuk mjaftojnë për të fituar ne. Nga ne kërkohen ndryshime të tjera të thella. Një nga ndryshimet më të thella që mund të shënojmë ne, është ridimensionimi i rolit të gruas, në Partinë Demokratike, në jetën politike të saj dhe të Shqipërisë”, deklaroi Berisha.
Discussion about this post