Berisha flet për një dosje të re: 26/1 është dosja e ferrit dhe tmerrit për Ramën dhe Ballën

Kreu i Partisë Demokratike, Sali Berisha foli këtë të enjte për një dosje të emëruar “26/1”, që sipas tij përmban çështje në të cilat janë të përfshirë kryeministri Edi Rama dhe ministri socialist Taulant Balla.

Sipas Berishës, kjo është një dosje e cila nuk po hetohet vetëm nga SPAK, por edhe nga agjenci dhe shërbime të huaja.

“Dosja 26/1 është dosja e ferrit dhe e tmerrit Balla-Rama. Po të vini re ju edhe në konferencën e fundit, Ramës kur i thotë gazetari për dosje, i dridhet zëri, ka të tjerë më shumë se unë, tha ai. Sepse ka edhe një faktor ndërkombëtar shumë të rëndësishëm. Televizioni kombëtar belg i nxori emrin atij. Nuk ia nxori Altin Dumani emrin, por ia nxori televizioni kombëtar i Blegjikës”, tha Berisha në emisionin televiziv  “Now me Erla Mëhillin” në Euronews Albania.

I pyetur nga moderatorja se për çfarë çështjesh bëhet fjalë në këtë dosje, ish-kryeministri tha:

“Për Ramën mund të mos ketë çështje që nuk është i përfshirë. Rama është i zhytur në gjëra nga më të pakonceptueshme. Dosja 26/1 në dijeninë time është dosja, Balla-Rama, por atë nuk e ka vetëm Dumani, e kanë disa agjenci dhe shërbime të huaja. Çështja e luftës kundër kriminalitetit është çështje e sigurisë kombëtare”.

Ai u pyet edhe për përgjimet e publikuara prej tij më herët, ku përmenden eksponentë të rëndësishëm të PS, duke u shprehur se janë të bazuara në fakte dhe dosje konkrete.

Teksa iu referua përgjimeve të publikuara prej tij për Taulant Ballën, Berisha u shpreh se të gjitha i ka të provuara dhe SPAK nuk mund ta përgënjeshtrojë.

“Unë jam njëri i ligjit dhe pas gjithë këtyre proceseve nuk është gjetur asgjë e kundërligjshme. Kur unë gjej dosjen që më vjen nga SPAK apo burime të tjera kur thuhet Tao mori porosi të shkojë e të lirojë 2 vrasësit që i vunë Lulzim Kullës tritolin në shalën e biçikletës, akt i mirëfilltë terrorist…a mund të them gjë tjetër veç organizatë kriminale. Shembull tjetër Toyota Yaris është implikuar në të gjitha etapat e atij krimi, e kanë dosjen aty… SPAK nuk më përgënjeshtron dot si i nxjerr dokumente, nuk mundet kurrë unë… mund të bëjë një gjë ndonjëherë për të mbrojtur dëshmitarët i spostoj pak këtej pak andej. Një nga një do ju faktoj shqiptarëve se ata janë një organizatë e mirëfilltë kriminale”, tha Berisha.