Kreu demokrat Sali Berisha dhe ish-Kryetari i PD-së, Lulzim Basha, janë përfshirë sot në debate në distancë mes tyre.
Gjatë një konference për mediat, Berisha duke komentuar zgjedhjet e thirrura nga grupimi i Lulzim Bashës në PD-në e vulës, tha se ky është skenari i Edi Ramës dhe Taulant Ballës.
“Kam besim të plotë te demokratët, te idealet e tyre demokratike, se nuk do i lejojnë kurrë vetes, nuk do pranojnë të bëhen pjesë e një skenari të Edi Ramës dhe Taulant Ballës.
Të turpshëm, me të cilin nuk kanë qëllim tjetër, vetëm të krijojnë një patericë të tyre, njëlloj siç bëri Ramiz Alia në vitin 1991, që shpalli Frontin apo Organizatën e Gruas si organizata elektorale.
Unë kam bindjen që demokratët do qëndrojnë në lartësinë e tyre.
Jam i bindur se demokratët nuk do i lejojnë vetes të implikohen apo të mbështesin një skenar që me të vërtetë përbën skenarin më të turpshëm në historinë 32-vjeçare të pluralizmit politik”, tha Berisha.
Ndërkohë përmes rrjeteve sociale, Lulzim Basha, i kërkon Berishës që të votojë vettingun në politikë.
“Ka vetëm një rrugë që të tregojmë kush është i korruptuar e kush jo, kush është peng e kush jo, kush është i lidhur me krimin e kush jo, le të votojmë vetingun për politikanët dhe familjarët e tyre.
Të nisë transparenca nga unë e më pas të gjithë këta që sot e 32 vite mbajnë peng Shqipërinë. Kjo është rruga e vetme për të çliruar pengjet, luftuar korrupsionin dhe pastruar politikën”, shkruan Basha.
Discussion about this post