Berisha hedh akuza të forta për Vlora Hysenin: Rama e përdorte për të rrëzuar qeverinë e Kosovës

Kreu i Partisë Demokratike, Sali Berisha, ka ngritur akuza të reja lidhur me periudhën kur Vlora Hyseni drejtonte Shërbimin Informativ të Shtetit.

Sipas Berishës, në vitin 2023 një specialist i IT-së në SHISH kishte hartuar një raport, në të cilin shprehte shqetësimin për atë që e konsideronte përfshirje abuzive të drejtoreshës së atëhershme në veprimtarinë e AKSHI-t.

Berisha pretendoi se materiali nuk iu përcoll instancave më të larta, por u asgjësua në kundërshtim me ligjin dhe rregullat e Shërbimit.

“Në vitin 2023, një specialist i IT në Shërbimin Informativ ka informuar, ka bërë raport dhe ka shprehur shqetësimin e thellë se drejtoresha po implikohej në mënyrë abuzive në veprimtarinë e AKSH-it. Ky material nuk është përcjellë në instancat eprore, por është asgjësuar në kundërshtim me ligjin dhe rregullat e Shërbimit. Me tender sekret, kjo ka organizuar personat që do të siguronin rrjetin informatik të Shërbimit Informativ dhe këta persona janë persona të palicencuar”, tha Berisha.

Kreu i PD-së ngriti akuza edhe lidhur me aktivitetin e Hysenit gjatë periudhës që ajo ishte në krye të SHISH-it. Sipas tij, ish-drejtoresha është përdorur nga kryeministri Edi Rama në raport me zhvillimet politike në Kosovë, ndërsa pretendoi se ajo ka pasur lidhje edhe në Maqedoninë e Veriut.

“Unë ndjej keqardhje të thellë që sot ky Shërbim, me një trashëgimi të pamohueshme të çmuar në bashkëpunim ndërkombëtar, por edhe në fushën e sigurisë, bëhet objekt i një turpërimi botëror për shkak të Edi Ramës, që merr një njeri jashtë të gjitha kritereve, të shkarkuar nga një qeveri, të cilën e ka përdorur për të rrëzuar qeverinë e Kosovës. Po ka implikime gjithashtu edhe në Maqedoni. Sepse lidhjet kjo i ka pasur të shumëllojshme”, tha Berisha.

Deklaratat vijnë pas zhvillimeve të fundit që lidhen me Hysenin, ndaj së cilës është caktuar masa e sigurisë “arrest në shtëpi”.

Duke komentuar situatën në Shërbimin Informativ të Shtetit, Berisha u bëri thirrje punonjësve të institucionit të ruajnë integritetin e tij.

“Unë ndjej keqardhje të thellë që sot ky Shërbim, me një trashëgimi të pamohueshme të çmuar në bashkëpunim ndërkombëtar, por edhe në fushën e sigurisë, bëhet objekt i një turpërimi botëror për shkak të Edi Ramës”, deklaroi Berisha.