Ish-kryeministri Sali Berisha ka reaguar vetëm pak minuta pas deklaratës së kryedemokratit Lulzim Basha, i cili u tregua i prerë kur tha se nuk do lejojë mbledhjen e asnjë Kuvendi që shqyrton vendimet e Departamentit të Shtetit.
Përmes një postimi në Facebook, Berisha fajëson Bashën për qëndrimin e kryeministrit Rama në pushtet, teksa shton se Kuvendi do të mblidhet për të shqyrtuar vendimit e Bashës ose siç e quan ai “pengu i Edi Ramës”.
“Për 8 vjet Edi Rama vazhdon të qëndrojë në pushtet sepse është në pazar me dikë që është shumë i kënaqur të qëndrojë edhe 80 vjet në opozitë. Kuvendi i PD do mblidhet në përputhje me statutin e PD dhe askush që tmerrohet prej tij nuk mund ta pengojë. Ai nuk nuk do të mblidhet për të shqyrtuar vendimet e asnjë qeverie por vetëm vendimet e pengut të Edi Ramës”.
Sipas Berishës, kuvendi do të mblidhet për të shpëtuar PD dhe kthyer shpresën demokratëve pas katër betejave të humbura radhazi.
“Kuvendi do mblidhet gjithashtu për të shpëtuar PD nga pazaret e peng Bashës me Edi Ramën dhe për t’u rikthyer dinjitetin dhe shpresën demokratëve pas 4 humbjesh radhazi përballë regjimit më të korruptuar dhe inkriminuar të Europës. PD nuk i duhet një lider i kapur peng që bën pazar me Ramën dhe shpall non grata bazën e partisë i tmerruar prej saj”, shkruan Berisha.
Pas vendimit për përjashtimin nga grupi parlamentar i PD, Basha dhe Berisha kanë hyrë në një përplasje me njëri-tjetrin, ku ish-kryeministri e akuzon për shitje të interesave të PD, përfitime personale dhe bashkëpunim me Edi Ramën.
