Ish-zv.kryeministri Erion Braçe, njëkohësisht deputeti PS, ka reaguar lidhur me protestat e naftëtarëve të Ballshit që kërkojnë të marrin 13 pagat e prapambetura si dhe të mos shembet rafineria e naftës.
Deputeti socialist shkruan se në vitin 2008 uzina iu shit biznesmenit Rezart Taçi nga kryeministri i kohës Sali Berisha për interesa personale dhe 5 vite më vonë Taçi ia dha një kompanie me seli në ishujt Virxhinia.
“Që nga viti 2008 kur një kriminel në pushtet vendosi të transferojë nga shteti tek privati, për interesa të familjes, dhe nën gojë mbylljen e shumë politikanëve në pushtet e opozitës, një aset kombëtar jetik, mungesa e transparencës dhemb pafund, madje të ngre nervat. Në 2008-ën rafinerinë e Ballshit e bleu Rezart Taci në një proces korruptiv, kriminal; Në 2013-ën, në korrik, fill pas humbjes së pushtetit nga familja, rafinerinë e Ballshit e shiti Rezart Taci dhe e bleu një kompani e regjistruar në një parajsë fiskale në ishujt Virxhinia; Nga ajo ditë, në QKB nuk as shitje e as blerje, mbi të gjitha nuk ka asnjë bankë në listën e pronarëve”, shkruan deputeti.
Për sa i përket kërkesës së marrjes së pagave të prapambetura, Braçe shtoi se ky është detyrim që i takon subjektit privat që e ka menaxhuar rafinerinë dhe jo qeverisë dhe se duhet të bëhet transparenca e plotë. Ai bën thirrje të zbatohen vendimet e gjykatës dhe të shlyen rrogat e punëtorëve.
Së fundmi, deputeti shprehet se interesi publik, në këtë rast ai i naftës është interes kombëtar, pasi sipas tij, jemi i vetmi vend në Europë me burime nafte në tokë.
Discussion about this post