Kryetari i Partisë Demokratike, Sali Berisha, ka zhvilluar sot një konferencë për shtyp, ku ka denoncuar qeverinë për atë që ai e cilësoi si “mashtrim” me shifrat e eksporteve, turizmit, si dhe për manipulim të procesit zgjedhor.
“Manipulimi i të dhënave ekonomike”
Berisha akuzoi kryeministrin Edi Rama dhe Institutin e Statistikave (INSTAT) për përllogaritje të gabuar të eksporteve. Sipas tij, qeveria po përfshin në shifra mallra që kalojnë thjesht në tranzit drejt Kosovës, duke i paraqitur si “ri-eksporte”. Ai solli si shembull importin e naftës nga Kosova, që sipas tij llogaritet si eksport shqiptar.
I njëjti manipulim, sipas Berishës, po ndodh edhe me statistikat e turizmit. Kryedemokrati tha se qeveria po përfshin në shifrat e turistëve edhe pasagjerët në tranzit në Aeroportin e Rinasit, një praktikë që bie ndesh me standardet ndërkombëtare. Ai shtoi se vendi po përjeton një rënie të turizmit, veçanërisht në jug dhe në zonat bregdetare të Durrësit, ndërsa në veri qeveria ka dëmtuar sektorin duke shembur ndërtime me leje në zona turistike si Thethi.
Akuzat për manipulim zgjedhor dhe pensionin e Ramës
Gjatë fjalës së tij, Berisha shfaqi pamje konkrete që, sipas tij, dëshmojnë për votime të shumëfishta në dy qendra votimi në Zall Bastar dhe në Elbasan. Ai i cilësoi zgjedhjet e 11 majit si “një farsë e organizuar” nga strukturat e patronazhimit dhe komisionerë të lidhur me Partinë Socialiste.
Gjithashtu, kryetari i PD-së ngriti akuza për një “narkodiktaturë autoritare” të instaluar në vend dhe denoncoi atë që e quajti një “akt i papranueshëm” nga ana e kryeministrit Rama. Berisha u shpreh se kryeministri i ka caktuar vetes një pension rekord prej 4 milionë lekësh në muaj, duke e cilësuar këtë shifër si 30 herë më të lartë se mesatarja kombëtare.
Discussion about this post