Pedagogu Mark Marku, i cili dorëzoi mandatin e deputetit të marrë nga zgjedhjet e 25 prillit, u shpreh se Sali Berisha ka qenë pronar i PD-së nga 1992 deri në 2013 dhe më pas caktoi administratorin e partisë, Lulzim Bashën.
Në një intervistë për mediat, Marku tha se lëvizja e Berishës nuk ka lidhje me demokratizimin e Partisë Demokratike, por me interesat e tij.
“Ai nisi lëvizjen pasi Basha mori vendimin për largimin e Berishës nga Grupi Parlamentar. Mendoj se kjo është çështje e Berishës dhe unë nuk e di nëse PD do të sakrifikohet ose jo për Sali Berishën”- tha Mark Marku.
Më tej ai thotë se problemi nuk zgjidhet as duke hequr Lulzim Bashën dhe as që ai të rrijë duke mos bërë disa lëvizje.
“Shoqëria shqiptare kërkon argumente. Basha duhet të dalë dhe të shpjegojë, pasi kjo lëvizje e Berishës po e shkatërron PD. Nëse Berisha kthehet në krye të PD e humbin përjetësisht pushtetin. Basha duhet të dalë me një koncept të ri për partinë” – tha Mark Marku.
