Ish-kryeministri Sali Berisha vijon me foltoret, ku kësaj radhe ka takim me shqiptarët në Florida. Edhe në foltoren e ditës së sotme, ish-kryeministri Sali Berisha u shpreh se ambasadorja e SHBA-së në Tiranë, Yuri Kim është kataliste në marrjen peng të opozitës. Gjithashtu, Berisha tha se Kuvendi Kombëtar i PD i mbledhur dje mori vendime historike dhe vendosi rithemelimin e Partisë Demokratike. Lideri historik i PD tha se ka patur presione nga Rama, Basha dhe Yuri Kim kundër ‘Foltores’.
“Ne dje patëm Kuvendin e Jashtëzakonshëm të PD, Kuvendi më i jashtëzakonshëm që është mbajtur ndonjëherë në historinë pluraliste të vendit, ndoshta edhe në historinë e pluralizimit të vendeve të tjera. Sepse ky ishte Kuvendi i parë që mblidhej me firmat e anëtarëve të Kuvendit të PD, mbasi udhëheqja e kësaj partie nuk pranonte të mblidhte Kuvendin. Kjo sepse e dinte që Kuvendi do t’u tregonte atyre vendin e merituar për shkelmimin që i kishin bërë statutit të PD. Për shkelmimin që iu kishin bërë forumeve të PD. Parimeve mbi të cilat ishte ndërtuar kjo forcë politike. Për zhvendosjen e kësaj force nga konservatore në një parti të majtë tërësisht, e larguar nga vlerat tona të përbashkëta, liritë dhe të drejtat njerëzore. Kundrejt presioneve të jashtëzakonshme të qeverisë që ka marrë peng udhëheqjen e PD, por duhet të pranojmë presionet e pandershme edhe të pengut të qeverisë, ish-kryetarit Basha, sot deputetit Basha, i asistuar në një mënyrë ose tjetër, edhe nga ambasadorja e SHBA në Tiranë, Yuri Kim e cila me ndërhyrjet e saj është kataliste e gjendjes së krijuar. Faktikisht e marrjes së peng të opozitës nga qeveria. Ju e dini se një vendim në datën 19 maj u shpall nga DASH në të cilën njoftohesha se jam shpallur non grata për korrupsion. Menjëherë në letrën që i drejtova Blinken i them se ky është akt i lobimit korruptiv të Ramës dhe Soros, një armik i egër ky i fundit i demokracisë shqiptare dhe interesave kombëtare shqiptare“, deklaroi Berisha.
Berisha tha se rrjeti i Soros në Shqipëri përbëhej nga individë të ekstremit të majtë dhe ai u vendos nën ombrellën ose si levë e PS. Ish-kryeministri shtoi se Soros i dha Edi Ramës në dorë Drejtësinë.
Discussion about this post