Në një tjetër bashkëbisedim me ndjekësit, Sali Berisha u pyet për raportin mes Partisë Demokratike dhe Partisë Socialiste gjatë 15 viteve të fundit, si dhe nëse sheh një epërsi të PS-së ndaj opozitës.
Berisha e hodhi poshtë këtë vlerësim, duke ngritur akuza të forta ndaj drejtuesve të PS-së dhe duke i cilësuar ata si pjesë të një strukture kriminale.
Kreu i PD-së tha se nuk mund të bëhet, sipas tij, asnjë krahasim mes dy forcave politike, duke e konsideruar opozitën si një forcë që ka denoncuar vazhdimisht problemet dhe shkeljet që pretendon se janë kryer nga qeveria. Berisha e përfundoi përgjigjen duke deklaruar se PD ka, sipas tij, “epërsi të padiskutueshme” në rrafshin moral.
Pyetje: A e shihni Partinë Socialiste si më superiore dhe Partinë Demokratike si më inferiore në këtë 15 vitet e fundit?
Berisha: Më vjen keq, kurrë. Partia Socialiste është parti e krimit të ndërthurur z. Bakalli. Dhe krimi s’mund të konsiderohet kurrë superior!
Ju mund të më thoni mua se po lëndoni socialistët e thjeshtë. Nuk e kam fjalën për socialistët e thjeshtë. Por elita e Partisë Socialiste është kryekëput një elitë kriminale dhe më thuaj ti mua një prej tyre të të jap fakte dhe dokumente për të.
Ata deputetë që janë aty dhe që heshtin ndaj gjithçkaje që bën kreu i tyre, ata nuk mbrojnë Edi Ramën. Ata mbrojnë pasuritë e tyre të krimit. Ata mbrojnë lidhjet e tyre me bandat dhe krimin. Ndaj dhe nuk mund të bëhet asnjë lloj krahasimi i nderuar zotëri, midis Partisë Demokratike dhe një organizate kriminale. Organizatë të vërtetë kriminale, të kryesuar nga Edi Rama.
Ju mund të më thoni, zgjedhjet? Është fatkeqësi në qoftë se e mendoni. Pse? Një narko-shtet nuk bën zgjedhje. Një narko-shtet zhvillon farsa, por të paktën këtë arritëm. Arritëm ta damkosim para komunitetit ndërkombëtar.
Pra, është e kundërta, unë shoh një opozitë që qëndron në kushtet më të vështira dhe kjo përbën epërsi të pakontestueshme morale.
Shoh një opozitë që u përpoqën ta zhdukin, por që qëndroi e pamposhtur.
Shoh një opozitë, e cila ka qëndruar ndaj të gjitha krimeve dhe i ka paralajmëruar ato kohë pas kohe dhe në mënyrë të përsëritur para shqiptarëve.
Sot nuk del asnjë problem i vetëm që ne si opozitë të mos ia kemi paraqitur publikut, të mos i kemi denoncuar. Çfarë dua të them me këtë? Ne qëndruam si opozitë e vërtetë, siç na takonte dhe i shërbyem interesit publik në një kohë kur të tjerët qëndruan si organizatë kriminale. Tërësisht. Qëndruan si parti e bazuar në miliardat e drogës, të kontrabandës, tëvjedhjes së taksave tuaja, të vjedhjes së pronave publike.
Jo, nuk ka gjë më të zezë se kjo forcë politike. Epërsia është e padiskutueshme e Partisë Demokratike në rrafshin moral.
Discussion about this post