Berisha: Marrëveshjen e portit të Durrësit do ta çojmë në Strasburg, edhe Butrinti…

Kryemokrati, Sali Berisha e ka quajtur antikushtetues vendimin e Gjykatës Kushtetuese për marrëveshjen e Portit të Durrësit me qeverinë shqiptare.

Sipas Berishës, Gjykata Kushtetuese është shndërruar në një aneks të PS-së dhe ka shkelmuar në mënyrë të tmerrshme interesin publik.

Kreu i demokratëve theksoi se marrëveshja e Portit të Durrësit do të çohet në Strazburg.

“Tani ju jeni informuar, Gjykata Kushtetuese dhe ajo është shndërruar në një aneks të PS-së. Ka marrë vendimet më antikushtetuese dhe ka shkelmuar në mënyrë të tmerrshme interesin publik. Duhet bërë një hetim nëse ata gjykatës kanë marrë ndonjë apartament në Dubai City të Edi Ramës, me vendimin që morën.

Të miratosh një marrëveshje e cila shkel në mënyrë flagrante marrëveshjen e stabilizim asociimit. Ndalem këtu, sepse në kushtetutën tonë dhe jo vetëm në të, marrëveshja ndërkombëtare prevalon mbi ligjin e vendit, predominon mbi ligjin e vendit.

Të përdorësh klauzolën e Kushtetutës që thotë se marrëveshja shqyrtohet para se të votohet në parlament, është një spekulim. Sepse ka një nen tjetër Kushtetuta që zgjat afatin e shqyrtimit të ligjit në dy vite dhe marrëveshja shkon si ligj, marrëveshja thotë ligj, aq më tepër kur kjo marrëveshje është në kundërshtim të hapur me marrëveshjen e stabilizim-asociimit dhe gjykata Kushtetuese është e detyruar ti japë përparësi marrëveshjes së stabilizim-asociimit përpara marrëveshjes së Durrësit.

E treta, siç e dini është një marrëveshje pa garë, e cila në vetvete është në shkelje të Kushtetutës, e cila garanton në nenet dhe frymën e saj garën e hapur dhe të lirë, kjo është bërë pa garë. Dhe këto nuk janë motive për gjykatën Kushtetuese, por njëlloj si të kenë marrë ndonjë apartament në Dubai City, duke treguar një qëndrim korruptim, antiligjor të pashembullt.”, tha ai.

Ne do ta çojmë në Strasburg marrëveshjen e portit të Durrësit.

Po përpiqen ta kalojnë çështjen e Butrintit, ajo do të bëhet çështje botërore, ndërkombëtare dhe nuk do të pranohet kurrë një vendim i korruptuar i kësaj Gjykate. Është gjithçka në konflikt interesi. Është një nga megaaferat më të mëdha dhe shkatërrimi i Parkut të Butrintit”, është shprehur Berisha.