Kryetari i Partisë Demokratike, Sali Berisha deklaroi sot se koha do të provojë se si mazhoranca do të pësojë disfatën më të thellë më datën 11 maj.
Në një prononcim për mediet jashtë ambienteve të Kuvendit, Berisha tha se mazhoranca do të arkivohet në banesën e turpit të historisë me këtë që i kanë bërë Shqipërisë.
“Këta në grup nuk merren me problemet e zgjedhësve të tyre, të atyre që i kanë votuar, këta merren me problemet me opozitën, si të mbrojnë vjedhjet e tyre nga opozita, si të reagojnë me armiqësi ndaj opozitës. E vërteta është se janë në shkërmoqje, siç e keni parë vetë. Janë në një betejë të brendshme dhe unitet me krimin nuk ka”, theksoi Berisha.
Kreu i PD-së u shpreh se “mbrojtja që i bën Edi Rama, Olta Xhaçkës, është mbrojtje që ai i bën aksioneve të veta që ka në të gjithë investitorët strategjikë, përfshi edhe burrin strategjik të Olta Xhaçkës, Artan Gaçi”.
Berisha foli edhe edhe për tenderat e rrugëve duke theksuar se “nga viti 2005 deri në vitin 2013 nuk kishit dëgjuar ndonjëherë fjalën ‘lot’, se rruga kontraktohej nga Farka në Bradashesh, nga Rrësheni në Kukës, nga Orikumi në Sarandë, pra këta kanë kthyer modelin e loteve, është modeli i shumëfishimit të vjedhjeve”.
Discussion about this post