Ka nisur pasditen e së martën mbledhja e Kryesisë së Partisë Demokratike në selinë blu. Takimi vjen vetëm pak orë nga përfundimi i takimit midis Gazment Bardhi dhe Edi Paloka në një bar-kafe përballë Parlamentit.
Ish-kryeministri Sali Berisha njoftoi se PD do të hapë garën Primare për kandidatët për kryebashkiakë si dhe do të miratojë modalitetin për votimin e simpatizantëve. Berisha deklaroi se të gjithë janë të lirë të paraqesin vullnetin e tyre për të kandiduar, ndërsa shtoi se ky është një hap i rëndësishëm për demokracinë e vendit. Ai gjithashtu ftoi aleatët e tij se mirëpresim çdo sugjerim.
“Ka kaluar në formalitet. Në diktaturë ne votonim çdo katër vite por e merrnin në dorë patronazhistët. Beteja për votën e opozitës shqiptare është për idealet më të larta demokratike për të vendosur në themel të shtetit ligjor vullnetin e lirë të qytetarëve shqiptarë. Udhëzuesi ka edhe datat për veprime konkrete. Janë zhvilluar dhe do të zhvillohen takime me aleatët për të gjetur gjuhën e përbashkët. Kanë sugjerime të drejta. Theksoj se mirëpriten të gjitha sugjerimet e tyre dhe kandidaturat e tyre. Mirëpriten në mënyrë të padiskutueshme kandidatura nga shoqëria civile dhe bota akademike e vendit. Hapim një garë të paparë ndonjëherë në historinë e këtij vendi. Duhet të bëjmë gjithçka për suksesin e kësaj gare. Ekzistojnë kushtet dhe mundësinë për një proces dinjitoz dhe transparent”, tha Berisha.
Discussion about this post