Berisha mbledh nesër Kryesinë e PD, ja pikat “e nxehta” që do të diskutohen

Nesër ish-kryeministri Sali Berisha do të mbledhë kryesinë e Partisë Demokratike. Takimi do të mbahet në orën 13:30, ku do të vendoset data e çeljes së procesit të primareve për të zgjedhur kandidatët për kryetar bashkie për zgjedhjet e 2023.

Veç vendimit për datat e primareve, kryesia e PD-së që drejtohet nga kryedemokrati Berisha, do të miratojë edhe rregulloren e udhëzimit mbi modalitetet e pjesëmarrjes në votimet për primare të simpatizantëve. “Më 18 tetor, në orën 13 e 30, do të zhvillojmë mbledhjen e Kryesisë së PD, me këtë rend dite:

1. Miratimi i Udhëzimit ‘Mbi modalitetet e pjesëmarrjes së simpatizantëve në Primaret për zgjedhjet e pushtetit vendor 2023’
2. Zgjedhja e KOKOE
3. Hapja e garës së Primareve për pushtetin vendor, në të gjitha degët e PDSH”, thuhet në mesazhin që ka mbërritur në anëtarët e kryesisë.

Ndërkohë, para se të mbledhë kryesinë, mësohet se sot lideri demokrat, Sali Berisha, ka thirrur në takim në mesditë drejtuesit politik sipas qarqeve. Ndërkohë që nuk dihet rendi i ditës së këtij takimi.