Ish-kryeministri Sali Berisha ka paralajmëruar nisjen e protestave opozitare më 12 nëntor. Në një konferencë për mediat nga selia blu, Berisha deklaroi se protestat ndaj regjimit të Edi Ramës nuk do të ndalen, deri sa shqiptarët të fitojnë lirinë e plotë.
“Jam sot për të informuar opinionin publik shqiptar në Shqipëri dhe kudo që ndodhet se opozita shqiptare, PD, PL dhe forcat e tjera opozitare nisin më datën 12 nëntor betejën e madhe kundër regjimit të urryer absolut, regjimit të narkoshtetit të parë dhe të vetëm në Europë, regjimit të partisë shtet, regjimit të Edi Ramës. Në të katër anët e Shqipërisë po bien sirenat e urrejtjes ndaj monizmit të Edi Ramës. Në të katër anët e Shqipërisë po bien sirenat e alarmit ndaj gjendjes katastrofale të krijuar nga vjedhjet e mëdha dhe të papërmbajtura të fondeve buxhetore, pasurive publike, të qytetarëve shqiptarë“, tha Berisha.
Kjo deklaratë e Berishës vjen pak orë pas takimit të tij me kreun e Partisë së Lirisë, Ilir Meta në selinë blu, ndërsa nesër pritet të firmoset marrëveshje mes dy partive për bashkëpunimin për zgjedhjet lokale të 14 majit 2023, ku PD ka deklaruar se opozita do të dalë me kandidatë të përbashkët.
Discussion about this post