Kryetari i Partisë Demokratike, Sali Berisha, ka zhvilluar një takim me Presidentin e Asamblesë Parlamentare të Këshillit të Evropës (PACE), Theodoros Roussopoulos. Në takim, Berisha ka paraqitur një sërë akuzash të rënda, duke e cilësuar qeverisjen e kryeministrit Edi Rama si një “narkodiktaturë” që ka shkaktuar pasoja dramatike në shtetin ligjor dhe ekonomi.
Pas shprehjes së mirënjohjes për mbështetjen e Asamblesë ndaj aspiratave evropiane të Shqipërisë, Berisha ngriti shqetësime thelbësore lidhur me situatën aktuale në vend, sipas një njoftimi nga zyra e shtypit pranë PD.
Gjatë takimit, Berisha theksoi se Shqipëria është shndërruar në “të vetmin narco-shtet në Evropë”, ku krimi i organizuar dhe korrupsioni politik ushqehen nga trafiku i drogës. Sipas tij, ky bashkëpunim i qeverisë me kartelet kriminale ka shkatërruar themelet e shtetit.
Një nga çështjet kryesore të ngritura ishte shpopullimi masiv. Duke iu referuar të dhënave të Eurostat, Berisha pohoi se Shqipëria ka humbur mbi 1.099 milionë qytetarë vetëm drejt zonës Shengen në 10 vitet e fundit, duke paralajmëruar për një “kolaps demografik të pakthyeshëm”. Ai ia vuri këtë mungesës së shpresës, pasigurisë dhe mundësive për të rinjtë dhe profesionistët.
Berisha foli gjithashtu për dëmet ekonomike, duke deklaruar se “narkoeurot” që futen në vend me sasi të mëdha kanë shkaktuar një zhvlerësim të madh të monedhës vendase, e cila ka dëmtuar eksportet, prodhimin industrial e bujqësor dhe turizmin. Si dëshmi e pastrimit të parave të drogës, ai theksoi se ndërtimi në Shqipëri është 300% më i lartë se mesatarja e BE-së, ndërsa çmimet e apartamenteve vetëm rriten.
Lidhur me procesin zgjedhor, Berisha shprehu shqetësim për atë që ai e quajti “farsë zgjedhore parlamentare e vitit 2025”. Ai pohoi se kandidatë të Partisë Socialiste me lidhje të provuara me krimin rezultuan më të votuarit, ndërkohë që policia lobonte dhe shantazhonte për ndryshimin e raportit preliminar të OSBE/ODIHR-it.
Një pikë tjetër në diskutim ishte refuzimi i qeverisë për të zbatuar vendimet e Gjykatës Kushtetuese. Berisha tha se ky refuzim “i hapur e flagrant” konfirmon se pushteti gjyqësor në Shqipëri është thjesht formal. Si një provokim skandaloz, ai përmendi emërimin e znj. Olta Xhaçka në krye të Delegacionit Shqiptar në PACE, pavarësisht vendimeve të Gjykatës Kushtetuese dhe opinionit të Komisionit të Venecias kundër saj.
Në fund të takimit, Berisha i bëri thirrje Asamblesë dhe institucioneve të tjera ndërkombëtare që të rrisin vëmendjen ndaj “narkoregjimit autokratik” në Shqipëri, duke kërkuar mbështetje për rikthimin e demokracisë dhe zgjedhjeve të lira e të ndershme. Presidenti Roussopoulos rikonfirmoi angazhimin e PACE ndaj vlerave demokratike dhe shprehu gatishmërinë për të ndjekur nga afër çështjet e ngritura.
Discussion about this post