Berisha me reporterët e KiE: Të rishikohet reforma në drejtësi

Kryedemokrati Sali Berisha gjatë takimit me reporterët e Këshillit të Europës, theksoi se Shqipëria është rasti klasik ku krimi shndërrohet në votë dhe vota në krim.

Ai kërkoi po ashtu të ndërhyhet për të rishikuar reformën në drejtësi, pasi është e motivuar politikisht.

Postimi

Te dashur miq, mbrëmë prita në takim delegacionin e reporterëve të Asamblesë Parlamentare të Këshillit të Europës të përbërë nga Asim Mollazada, Jonut Stroe, Bas Klein dhe Giulia Re, shefe e zyrës së KiE në Shqipëri.

Duke i falenderuar për vizitën e tyre, u shpreha se Shqipëria gjendet në mesin e një krize që ka të bëjë me “marrëdhënien speciale” mes krimit dhe votës nën qeverisjen e Edi Ramës, ku metastazat e krimit kanë pushtuar çdo nivel të pushtetit. Duke i informuar raporterët për zgjedhjet e fundit, i bëra me dije se Shqiperia është rasti klasik ku krimi shndërrohet në votë dhe vota shndërrohet në krim, zgjidhja e kësaj marrdhënieje krim-zgjedhje është një nga pikat ku KiE duhet të japë kontribut.

I njoha përfaqësuesit e Këshillit të Europës me industrinë qeveritare të blerjes së votës dhe makinerinë shtetërore të terrorit elektoral ndaj zgjedhësve dhe angazhimin e krimit të organizuar kundër votës së lirë.

Çështje e dytë ku kërkova ndihmën e KiE është edhe sistemi i drejtësisë, i cili është i paralizuar.

Shqiptarët kanë humbur të drejtën themelore të një procesi ligjor të drejtë.

Stoku i dosjeve në të gjitha nivelet arrin në mbi 120 mijë dhe duhen rreth 30 vite për t’u shqyrtuar.

Ata që e ngritën këtë sistem të dështuar nuk ndërhyjnë dot më për ta riparuar sepse janë ‘aksionerë në dështim’.

U kërkova dërgatës së KiE që të ndërmjetësojnë për një ndërhyrje të Komisionit të Venecias për një rishikim të reformës së drejtësi në Shqipëri. Kjo reformë ka qenë politikisht e motivuar.

Në zgjedhjet e 14 majit administrata u kthye në ‘polici politike elektorale’ dhe qeveria krijoi 1.3 milion votues nomadë duke u ndërruar në momentin e fundit qendrën e votimit. Qeveria bëri përpjekje për të shkatërruar opozitën dhe emëruar një opozitë sipas orekseve të saj.

Thelbi i demokracisë është mundësia që u jep qytetarëve që çdo katër vjet të mund të ndërrojnë qeverinë. Ky shans u është hequr shqiptarëve sepse qeveria e mban pushtetin me ndihmën e krimit të organizuar.

Tentakulat e kësaj lidhjeje u panë në miliona faqet e mesazheve të dekriptuara të platformave Encrochat dhe Sky. Shqipja ishte gjuha e dytë në Europë në databazën e madhe kriminale që zbuluan policitë e vendeve partnere.

Në këto transkripte janë të gjitha lidhjet me krimin e organizuar të politikës në nivelet më të larta, ministra, kryeministri, gjykatës, prokuror, drejtora policie, ndaj publikimi i tyre do ishte ndihmë dhe transparencë e madhe për shqiptarët.