Kreu i Partisë Demokratike, Sali Berisha, ka reaguar pas lirimit me kusht të ish-deputetit Ervin Salianji, duke konfirmuar komunikimin e tij të vazhdueshëm me Salianjin dhe duke theksuar se do ta takojë së shpejti. Në një konferencë për mediat, Berisha ka ripërsëritur akuzat se dënimi i Salianjit ishte një akt i motivuar politikisht nga Kryeministri Edi Rama dhe ish-Ministri i Brendshëm Fatmir Xhafaj.
Berisha theksoi rolin e rëndësishëm të Salianjit brenda strukturave të Partisë Demokratike, duke kujtuar se ai mban postet e nënkryetarit të grupit parlamentar dhe anëtar i kryesisë. Ai shtoi se anëtarësia e PD-së do të përcaktojë funksionet e ardhshme të Salianjit dhe drejtuesve të tjerë.
Duke iu referuar dënimit të Salianjit, Berisha e quajti atë një “histori turpi” të dyshes “mafiozë Ramaduros dhe Fatmir Geron Xhafës”, duke shtuar se dënimi prej një viti burg ishte në kundërshtim me Kushtetutën dhe praktikën ligjore.
Berisha e lidhi dënimin e Salianjit me “pasigurinë” e Fatmir Xhafës, të cilin e akuzoi si “mafioz” dhe të frikësuar nga denoncimet e Salianjit. Ai deklaroi se ish-ministri Xhafa ishte i shqetësuar për pasuritë e tij të paligjshme dhe se kishte bashkëpunuar me Edi Ramën për këtë “akt”. Berisha shtoi se kjo ishte një përpjekje për të mbrojtur interesat e përbashkëta të Xhafës dhe Olsi Ramës në lojërat e fatit dhe aktivitete të tjera.
Në fund të deklaratës së tij për cështjen, Berisha la të kuptohet se çështja Salianji nuk do të mbyllet me lirimin e tij me kusht, por do të ndiqet deri në Strasburg. Ai lavdëroi Salianjin për qëndrimin e tij dinjitoz dhe të palëkundur gjatë kohës së burgimit dhe akuzoi gjykatën për zvarritje të vendimit dhe presione ndaj Salianjit, duke aluduar se i kishin kërkuar garanci për sigurinë e Fatmir dhe Geron Xhafës. Berisha përfundoi duke thënë se lirimi i Salianjit nuk e pengon atë të marrë vendin në Parlament si nënkryetar i grupit parlamentar, duke e cilësuar këtë si një betejë të vazhdueshme.
Discussion about this post