Berisha: Mijëra shqiptarë kanë humbur jetën nga ilaçet kallpe! Përgjegjësia është e Ramës

Kryedemokrati Sali Berisha ka vijuar me akuzat në drejtim të kryeministrit Edi Rama për gjendjen alarmante që ndodhet shëndetësia në Shqipëri, si dhe ilaçet që përdorin të sëmurët.

Berisha deklaron se mijëra shqiptarë kanë humbur jetën nga ilaçet kallpe dhe shton se përgjegjësia direkte është e Edi Ramës.

Berisha deklaron se kontratat firmosen dhe njëlloj si afera me ‘5D’, ilaçet nuk vijnë, pagesat bëhen dhe paratë vidhen.

“Shqipëria u invadua nga ilaçe të importuara nga stoqe, po të mos thonë edhe placebo, pa efekte, nga prodhimet e Tom Doshit dhe importet e Vilma Nushit, duke shkaktuar në këtë mënyrë humbjen e jetëve të mijëra e mijëra shqiptarëve.

Duke rrënuar në mënyrë përfundimtare sigurinë e ilaçeve në Shqipërinë, faktikisht sigurinë jetike të mjekimit të të sëmurëve.

Por nuk ka dyshim se sektori i shëndetësisë në raport me shëndetin dhe jetën është edhe sektori më delikat.

Në këtë kuadër, ka edhe mjekë, por edhe infermierë të cilët shkelmojnë parimet e humanizmit dhe ata që shkelin Betimin e Hipokratit, pa dyshim meritojnë të humbasin diplomat dhe të ndëshkohen me ligj.

Por miqtë e mi, në qoftë se në Shqipëri hynë ilaçe kallpe, kjo nuk është përgjegjësi e mjekëve. Kjo nuk është përgjegjësi e infermierëve.

Kjo është përgjegjësi e qeverisë direkt, e ministrit të shëndetësisë dhe Edi Ramës.

Në qoftë se në Shqipëri për vite nuk funksionon aparatura e radioterapisë, brakioterapia jetike për sulmin, dominimin dhe kufizimin e neoplazive të gjirit, ky është një krim kundër njerëzimit, i kryer nga qeveria, i kryer nga drejtoria e spitalit, ministria dhe kryeministria.

Nuk janë mjekët ata të cilët mund të sigurojnë aparatura, është qeveria që ka detyrim absolut të garantojë funksionimin e pandërprerë, të garantojë rifunksionimin e tyre.

Është qeveria e cila është e detyruar të garantojë sigurimin e pandërprerë me ilaçe.

Është krim i shëmtuar të mungojë jodi muaj dhe vite. Të mungojnë ilaçet më themelore të sëmundjeve neoplazike sepse paratë vidhen.

Sepse kontratat firmosen dhe njëlloj si 5D, më keq akoma, ilaçet nuk vijnë, pagesat bëhen, paratë vidhen.”- deklaron Berisha.