Kreu demokrat Sali Berisha tha se nga raportet Lek-Euro përfitojnë vetëm oligarkët, ndërsa theksoi se banka e Shqipërisë është e pafuqishme përballë narko-euros, duke iu referuar zhvlerësimit të monedhës europiane në raport me Lekun.
Berisha tha se janë narko-eurot që kanë pushtuar tregun, ndërsa akuzoi Qeverinë se ka favorizuar këtë fenomen.
“Shqipëria është e para në Europë në sektorin e ndërtimit, ndërsa vetën në Tiranë janë 3 mln metra katror ndërtime, kur nevoja vjetore është 1 mln metra katror.
Tirana është kthyer në lavatricen e pastrimit të parave të drogës në sektorin e ndërtimeve”, tha Berisha.
Ish-Kryeministri paralajmëroi se vendin e pret një rrokullisje e madhe, nëse nuk shkohet në thelbin e problemit që është narko-euro.
“Narko-euro shuan gjithçka tjetër, të gjitha kursimet e qytetarëve në euro janë zhvlerësuar në mënyrë dramatike. Të gjithë ata që kanë depozituar kursimet e tyre në euro, sot i kanë 10 % më pak”, tha Berisha.
Berisha tha se kjo që po ndodh me Euron në Shqipëri është një goditje shumë të rëndë e prodhimit, për aq sa eksportet janë motori i fuqishëm i tij.
“Janë debate të shumta dhe normale, mbi këtë situatë të zhvlerësimit të pamëshirë të monedhës evropiane, dhe të forcimit jashtë të çdo lloj logjike të lekut shqiptar.
Nuk ka diskutim se leku është një simbol kombëtar dhe si i tillë forcimi i tij duhet të jetë çështje krenarie, por në këtë rast është një çështje turpi kombëtar. Kjo sepse ata të cilët përfitojnë nga ky raport i krijuar lekë-euro dhe euro-lek janë narkoqeveritarët dhe narkotrafikatët.
Nga ky raport goditen në masë qindra dhe mijëra familje shqiptare që mbyllin ditën dhe muajt me të ardhurat e tyre në sipërmarrje që eksportojnë.
Nga ky raport goditet mbi 30% e popullatës shqiptare e cila jeton, përballon ditën me remitancat e rregullta që u dërgohen nga njerëzit e vet në emigracion dhe nja 40% të tjera që marrin herë pas here dhe i kanë pjesë të llogaritur të buxhetit.
Nga ky raport ata që përfitojnë janë përbindëshit e trafiqeve të drogës, të cilët fusin në Shqipëri euro me kontejner, kamionë, mikrobuzë, i mbajnë të groposura dhe i nxjerrin për ndërtime, i nxjerrin për të blerë më çmime stratosferike dhe bëjnë që ajo rritje ekonomike jo që të mos shoqërohet me një përmirësim të gjendjes ekonomike të familjeve të thjeshta shqiptare, por përkundrazi me një varfërim më të madh progresiv dhe ajo rritje të shkojë e tëra tek oligarkët dhe klanet e drogës”, tha Berisha.
Discussion about this post