Nga Elbasani, sot Sali Berisha i bëri thirrje qytetarëve të bashkohen e të ngrihen kundër këtij sistemi. Duke treguar se në takimin e fundit në Gjirokastër ai pa edhe më shumë se sa të varfër janë shqiptarët, Berisha tha se qeveria ndan fondet me oligarkët, prandaj duhet ta rrëzojmë atë, duke e quajtur banditokraci.
Ndër të tjera ai tha se “Foltorja” po u sjellë shpresë qytetarëve.
“Qytetarë të kësaj treve, dua t’iu falënderoj për këtë pritje të jashtëzakonshme, të cilën ju i rezervoni kësaj foltoreje, që në një kohë të shkurtër demokratët e Shqipërisë e shndërruan në ditë shprese. Jam më i frymëzuar se kurrë, për të dëshmuar se jemi më të vendosur se kurrë për të mbrojtur idealet e demokratëve.
Është një thirrje për çdo demokrat e çdo shqiptar të ngrihemi, të bashkohemi për të dhënë përgjigjen më të merituar kësaj situate tragjike, këtij sistemi që ka vetëm një emër: banditokraci.
Edi Rama dhe regjimi i tij ka katandisur Shqipërinë dhe shqiptarët në delen e zezë të Ballkanit dhe Europës, nga një tokë e pasur në një vend pa shpresë në të cilët të rinjtë ikin dhe vetëm ikin.
Para dy ditësh isha në Gjirokastër, në një mjedis të zjarrtë, do t’iu them me sinqeritet që ai entuziazëm ishte frymëzues, ndërsa shëtitja në rrugët e qytetit ishte dëshpëruese. Ishte i pafund vargu i dyqaneve të mbyllura, shkretëtirë. Mendova ca kanë bërë këta, shtro kalldrëm dhe vidh para, por asgjë tjetër asnjë projekt.
Kështu është në të gjithë Shqipërinë. Pas 8 vitesh ne jemi 30% me ulët më të ardhura se në 2012. Atëherë ne kishim rrogat më të larta, ndërsa sot kemi rrogat më të ulëta, edhe se Kosova. Pas 8 vitesh janë shpenzuar mbi 5 miliardë euro nga taksat dhe janë përfunduar vetë, 34 km autostradë që kanë qenë përgjysmë si projekte. Paratë i ndajnë oligarkët”, deklaroi ai.
Ndërkohë, Berisha deklaroi se Rama po e zhyt popullin çdo ditë në borxhe, duke përmendur këtu skandalin për energjinë elektrike.
gijotina.com/
