Berisha në listën e zezë të Britanisë? Kadilli: Për korrupsionin, çdo demokrat e ndjen veten viktimë

Ditën e sotme Mbretëria e Bashkuar ka bërë me dije se ka futur në listën “non-grata” një sërë zyrtarësh, mes tyre edhe shqiptarë, por pa përmendur emra. Sigurisht ky lajm ka sjellë reagime të shumta në politikën shqiptare dhe jo vetm. Këtë çështje e ka komentuar anëtari i Rithemelimit, Fatbardh Kadilli. Gjatë një interviste televizive ai u pyet nëse ekziston mundësia që në këtë listë të jetë edhe kryedemokrati Sali Berisha dhe çfarë do ndodhte më pas. Por, Kadilli tha se shpallja ‘non- grata’ e Sali Berishës edhe nga Mbretërisë së Bashkuar nuk do të ketë ndonjë efekt të madh. Ndërsa tha se, PD po e kalon goditjen që mori nga ndodhitë e fundit.

“Nuk kemi pse e lidhim me Berishën. Është për një grup njerëzish, është qëndrim zyrtar nga Mbretëria e Bashkuar që i ngjan qëndrimit të SHBA. Kjo është një qasje e re, kohët e fundit përdoret si instrument, mund të përdoret nesër edhe nga BE për politikanët. Përsa kohë nuk kemi konfirmim, nuk e dimë kush është.

Nëse parimisht çdo demokrat shprehet kundër korrupsionit, kur vjen puna tek Berisha, çdo demokrat e ndjen veten viktimë bashkë me Berishën. Nëse flasim për korrupsion, kemi qeverinë. Një qeveri e akuzuar për korrupsion me ministra në burg, shohim që shënjestra të jetë diku tjetër. Ky lloj çbalancimi e ka ndikuar jo për mirë në klimën brenda PD. Nuk ka prodhuar një projekt politik që kapërcen PD vetveten. Nuk pres që kjo të sjellë ndryshim. Kur nuk pati në momentin e parë, nuk do të ketë ndonjë efekt të madh as në momentin e dytë. Zhvillimet e PD prekin Shqipërinë, jo thjesht çfarë bëjnë ndërkombëtarët“, tha Kadilli.

Ndër të tjera, Kadilli nuk la pa thënë kritikat e tij për Bashën e Berishën. Sipas tij, opozita nuk arriti të krijonte një alternativë përballë pushtetit as kur ishte bashkë, as tani kur janë ndarë.

“Çështjen non- grata nuk e kam përdorur asnjëherë si levë politike. Siç kam pasur kritika për Bashën dhe kam për Berishën është se PD ka nevojë për projekt të ri politik. Opozita edhe kur ishte bashkë edhe tani që janë veç e veç, janë të pamjaftueshme për të krijuar një alternativë përballë pushtetit“, tha Kadilli.

Kujtojmë më 19 maj 2021 Sali Berisha u shpall ‘non- grata’ nga Shtetet e Bashkuara të Amerikës me akuza të forta se gjatë kohës që ishte kryeministër është përfshirë në akte korruptive si keqpërdorimi fondeve publike, minim i demokracisë dhe ndërhyrje me proceset publike duke përdorur fuqinë për përfitime personale dhe pasurimin e aleatëve politik përfshi familjen.