Ish-kryeministri Sali Berisha e nisi fjalën e mbajtur në tubimin poshtë banesës së tij këtë të premte me një urim për besimtarët bektashinj për Sulltan Novruzin. Berisha tha se, teqetë kanë qenë “qendra të shqiptarizmës”.
Berisha iu rikthye qeverisjes së tij, duke u shprehur se viti 2008 ishte viti kur PD ndau epokat. Berisha theksoi se gjatë qeverisjes së PD-së, u la pas epoka e varfërisë dhe Shqipëria hyri në epokën e prosperitetit.
Ai tha se 22 marsi i 1992 është një ngjarje e veçantë në gjithë historinë tonë. Berisha tha se fitorja e PD ishte në vazhdën e fitores së forcave antikomuniste në Europën Lindore pas rënies së Murit të Berlinit.
“22 marsi i 1992 është një ngjarje e veçantë në gjithë historinë tonë”, u shpreh.
Ai shtoi se kur PD ishte në pushtet, opozita nuk u persekutua kurrë.
“Ne kishim një opozitë armike të votës së lirë. Ne kishim një opozitë, armike të integrimit. Një opozitë që bënte gjithçka, që u fryu bilbilave tre muaj në mënyrë që Shqipëria të mos firmoste MSA. Një opozitë që çonte emisarët në katër anët për të bllokuar Shqipërinë në NATO, anëtarësimin e Shqipërisë. Që protestonte me portretet e Enver Hoxhës kundër anëtarësimit. Një opozitë që bllokoi rekomandimin e KE për statusin e kandidatit. Megjithatë ajo opozitë kurrë nuk iu mohuan të drejtat kushtetuese. Ajo opozitë nuk u persekutua kurrë”, tha.
Berisha iu drejtua kundërshtarit të tij politik, kryeministrit Edi Rama duke thënë se është 32 herë më i motivuar në betejën kundër diktaturës të instaluar nga ky i fundit. Berisha u shpreh se kauza e drejtë nuk njeh moshë.
Discussion about this post