Ish-Kryeministri Sali Berisha paralajmëroi sot nisjen e aksioneve të mosbindjes civile. Gjatë një takimi me drejtuesit e degëve të PD-së, Berisha tha se në Shqipëri nuk mund të ketë më paqe gjer në përmbysjen e mobokracisë.
“Rëndësi të jashtëzakonshme ka që këtij armiku, që shfaq ndaj nesh armiqësinë më të egër, t’i japim atë që meriton.
Të organizojmë në çdo degë dhe kudo, aksione dhe veprime të mosbindjes civile ndër më të fuqishmet.
Në Shqipëri nuk mund të ketë më paqe gjer në përmbysjen e mobokracisë dhe rivendosjen e të drejtave të shqiptarëve për të votuar të lirë.
Askush nuk do na i zgjidhë ne këto probleme. Kishte një rëndësi të jashtëzakonshme jehona planetare e veprimit në parlament. Por përsëri ju garantoj se askush nuk do vijë të përballet me Edi Ramën për ne.
Është vetëm guximi ynë, është vetëm sakrifica jonë, është vetëm vendimi ynë, ai që do t’i japë, të sigurtë, përgjigjen e merituar.
Ai e ka kuptuar këtë. Ai e kuptoi se nuk ka më kontroll mbi opozitën.
Ai e kuptoi se opozita është në këmbë dhe në sulm kundër saj. Ndaj dhe kaloi në akte të tjera antikushtetuese”, tha Berisha.
Në këtë kuadër ai shtoi se demokratët kudo që të jenë duhet të ngrihen me të gjitha mundësitë, me të gjitha mjetet e mosbindjes civile.
“Regjimi duhet të bllokohet.
Rivendosja e Kushtetutës, e pluralizmit, e të drejtës së shqiptarëve për të votuar të lirë, është misioni ynë, është misioni i të gjithë atyre që guxojnë.
Dhe unë ju garantoj ju se pavarësisht se mund të duket një situatë e topitur, por janë të panumërt midis jush dhe mbarë Shqipërinë, guximtarët që presin të organizohen në aksione kundër qeverisë”, tha ai.
Discussion about this post