Ndërsa ish-kryeministri Sali Berisha ka refuzuar të paraqitet në GJKKO për t’u marrë në pyetje, avokati i tij Genci Gjokutaj ka mbërritur pranë ambienteve të gjykatës.
Berisha zgjodhi të mbajë një konferencë me gazetarët në orarin e caktuar nga GJKKO për marrjen në pyetje të ish-kryeministrit lidhur me privatizimin e ish-kompleksit sportiv Partizani.
Kujtojmë se dje Gjokutaj u shpreh se në momentin kur Berisha nuk ka marrë vendim për procesin ligjor ndaj tij, ai nuk është pjesë e procesit.
“Ky është proces i parregullt ligjor. Në momentin kur zoti Berisha nuk ka marrë vendim, nuk është pjesë e procesit. Këtë ngërç procedural duhet ta zgjidhë gjykata. Duhet ta zgjidh organi i procedurës, ata që e bën”, u shpreh dje ai.
Pasditen e së hënës oficerët e Policisë Gjyqësore trokitën në apartamentin e ish-kryeministrit për t’i dorëzuar zarfin me vendimin e gjykatës, që caktoi masën “Detyrim paraqitje”, por ai nuk ishte në banesë.
Sali Berisha ka hedhur poshtë akuzat duke e cilësuar antikushtetuese vendimin e gjykatës. Sipas tij, kufizimi i lirive të deputetit merret me vendim të parlamentit.
Discussion about this post