Kryetari i Partisë Demokratike, Sali Berisha ka zhvilluar një takim me demokratët e Beratit, në kuadër të fushatës elektorale në 11 maj. Duke bërë një rezyme të zhvillimeve politike përgjatë 3 dekadave të fundit, Berisha theksoi se “PD ia doli të jetë surpriza e vërtetë e revolucioneve demokratike të viteve ’90”.
Gjatë fjalës së mbajtur në takim, lideri i opozitës foli edhe për bashkimin e demokratëve pas zhvillimeve brenda PD gjatë 3 viteve të fundit, si dhe sulmin e gjithanshëm të Edi Ramës sipas tij, për ta lënë vendin pa opozitë. “Tipari më kardinal i demokratëve është toleranca! U përpoqën të na bëjnë copë e çikë, sot jemi më të bashkuar se kurrë”, u shpreh.
Prej takimit me demokratët e Beratit, Berisha u bëri thirrje qytetarëve që të bashkohen me PD për të rrëzuar narko-diktaturën e Edi Ramës. “Tani duhet të bëjmë hapin tjetër më të madh drejt fitores, të bashkohemi me qytetarët e mbarë Shqipërisë”, theksoi.
Duke bërë një analizë të “keqqeverisjes” 12-vjeçare të Edi Ramës si kryeministër, lideri i demokratëve theksoi se sot ekziston fronti më i gjerë i pakënaqësisë ndaj qeverisë që nga viti 1991.
“Sot ekziston fronti më i gjerë i pakënaqësisë ndaj qeverisë që nga viti 1991. Ne duhet ta bashkojmë këtë front”, tha ai.
Kreu i Partisë Demokratike u ndal edhe te vota e diasporës në zgjedhjet parlamentare të 11 majit, duke i bërë thirrje demokratëve që të shumëfishojnë votat për PD-në. “Secili prej jush mund të shumëfishojë votën e tij me vëllezërit dhe motrat tona në emigracion! Le t’i ndihmojmë të regjistrohen”, nënvizoi kryedemokrati në fund të fjalës së tij me demokratët në Berat.
Discussion about this post