Departamenti Amerikan i Shtetit ka dërguar dosjen e Sali Berishës dhe familjes së tij në Kongresin Amerikan, ku ka raportuar mbi arsyet pse është shpallur “non grata” familjarisht. Raporti, i cili është publikuar nga ambasadorja e SHBA në vendin tonë, Yuri Kim, evidenton faktin se informacioni mbi personat që u refuzohet viza për të hyrë në Amerikë është mbledhur nga trupat diplomatike në bashkëpunim me autoritetet ligjzbatuese të vendit tonë.
Emri i Sali Berishës, bashkë me bashkëshorten, djalin dhe vajzën renditet mes 26 personave, të cilët janë shpallur “non grata” në muajt Prill-Korrik 2021. Personat e tjerë vihet re se janë nga Paraguai, Bullgaria Guatemala, etj.
DASH thekson për këto dosje, ku është dhe familja Berisha, se Sekretari i Shtetit ka informacion të besueshëm që janë përfshirë, drejtpërdrejt ose tërthorazi, në korrupsion të rëndësishëm, përfshirë korrupsionin në lidhje me nxjerrjen e burimeve natyrore, ose një shkelje të rëndë të të drejtave të njeriut.
Sipas këtij raporti, individët nuk do të jenë të papërshtatshëm për hyrje në Shtetet e Bashkuara, ndërkohë që ekziston vetëm një mundësi që ky status t’u hiqet atyre. “Sekretari mund të heqë dorë nga aplikimi vetëm nëse Sekretari përcakton se heqja dorë do t’i shërbente një interesi kombëtar bindës ose se rrethanat të cilat e bënë individin të ishte i papranueshëm kanë ndryshuar mjaftueshëm”, thuhet në raport.
Dërgimi i dosjes së familjes Berisha në Kongres vjen si detyrim ligjor i DASH për të dërguar të gjitha faktet dhe argumentet në një afat 90-ditor, nga dita që është firmosur vendimi. Aktualisht në raport janë publikuar vetëm pjesët e paklasifikuara sekret, pasi shumë informacione nuk mund të bëhen publike.
