Presidenti i Shqipërisë, Ilir Meta ka kërkuar që sovraniteti kombëtar ti kthehet qytetarit me votën e tij. I pyetur nga gazetarët nëse ambasadorja e SHBA ka cënuar sovranitetin kombëtar me kërcënimin për largimin e ish-kryeministrit Sali Berisha nga Kuvendi, Meta u shpreh se qytetarët nuk duhet të jenë viktimë e arbitrariteteve e kulisave dhe të jenë përballë faktit të kryer.
“Me gjithë detyrimet tona në raport me institucione e organizata i kemi të fiksuar qartë në Kushtetutën e Republikës së Shqipërisë. Besoj se në radhë të parë është e rëndësishme ti kthejmë sovranitetin qytetarëve. Ata mos injorohen e përjashtohen më, mos vendosen para faktit të kryer, mos jenë më viktimë e arbitraritetit e kulisave që kanë kërkuar e kërkojnë ta nxjerrin këtë sistem jashtë. Është bërë një hap me 25 prillin, por hapa të tjerë do të ndodhin në të ardhmen”.
Sipas presidentit, s’ka mbrojtës më të mirë të sovranitetit se vetë qytetarët, e sipas tij, kjo nuk nënkupton mos përmbushje të detyrave të Shqipërisë ndaj NATO apo BE.
”Së pari, sovraniteti është respektim i vullnetit të qytetarëve. S’ka mbrojtës më të mirë të sovranitetit kombëtar se sa vetë sovrani vetë qytetari, sigurisht kur ai është i ndërgjegjshëm për votën e tij, kur e mbron, nuk e shet, nuk e tregton. Sa i takon sovranitetit pa diskutim që fjala kyç për dekadat që vjen është sovranitet. Që nuk do të thotë mos përmbushje të detyrave të Shqipërisë ndaj NATO ku jemi anëtar prej kohësh apo BE, ku dëshirojmë të anëtarësohemi”, tha Meta.
Kryeministri Edi Rama dhe 16 ministrat e kabinetit qeveritar për legjislacionin e ardhshëm, do të betohen ditën e nesërme te presidenti Ilir Meta, pas votëbesimit në Kuvend me 77 vota pro, 53 kundër dhe 1 abstenim.
