Berisha paralajmëron: 1 milion shqiptarë në diasporë do mbeten pa votuar, të ngrihemi…

Kryedemokrati Sali Berisha ka paralajmëruar protesta dhe mosbindje civile dhe në botë, aty ku ndodhen ambasadat dhe konsullatat shqiptare.

Duke folur në konferencën me gazetarët, Berisha tha se 1 milion shqiptarë në diasporë rrezikojnë të mbeten pa votuar, ndërsa u bëri thirrje të përgatiten për protestat më të fuqishme para selive të ambasadave që përfaqësojnë, sipas tij, narkoshtetin, i cili kërkon t’i dënojë ata dhe de facto t’ua mohojë të drejtën e votës.

Sipas Berishës, kjo përbën një shkelje shumë të rëndë, me argumentin se nuk kanë dokument shqiptar, gjq që për kryedemokratin, një argument i tillë është i padëgjuar ndonjëherë.

Pjesë nga fjala

Pra, ne e bëmë edhe kompromisin, por meqenëse u kërkua dhe në sensin që të bëjmë ndryshime me lëshime reciproke, kjo nuk duhet të jetë fare lëshim se nuk mund të ketë forcë politike që të pranojë të ndëshkojë dy të tretat e shqiptarëve se nuk kanë letërnjoftimet shqiptare apo pasaportat në xhep.

Në këtë kontekst, unë ftoj edhe njëherë, në radhë të parë KQZ që të bëjë demarshet zyrtare dhe të shprehet publikisht sepse zbatimi i vendimit të Gjykatës Kushtetuese është një detyrim madhor kushtetues.

Përndryshe, ne do organizojmë demonstratat më të fuqishme pranë ambasadave të narkoshtetit, por jo vetëm pranë ambasadave.

Pra, do të nisë një lëvizje e re e fuqishme e mosbindjes civile, kjo që është në Shqipëri, do vazhdojë në botë.

Nuk mund të pajtohemi kurrë me një frikë dhe absurditet që tregon regjimi ndaj votës së emigracionit.

Kjo do të thotë të përjashtohesh të paktën 1 milionë shqiptarë nga e drejta e votës.

Sepse është bërë shumë e qartë, Eurostati thotë 1.1 milionë shqiptarë nga viti 2014 deri në vitin 2022. Prej tyre, nja 200 e ca mijë janë të palegalizuar. Të tjerët janë ose bashkim familjar, ose të legalizuar. Pra, dy të tretat ose më shumë janë se duan t’i përjashtojnë në këtë mënyrë.

Unë nuk them se të gjithë këta nuk kanë dokumente, por në tërësi nuk kanë dokumente.

Dhe nga të katër anët e vendit njoftohemi se ne nuk po regjistrohemi dot për shkak të dokumenteve.

Edhe njëherë u bëj thirrje të gjithë emigrantëve dhe diasporës, të përgatiten për protestat më të fuqishme para selive të ambasadave që përfaqësojnë narkoshtetin, i cili kërkon t’i dënojë ata dhe de facto t’ua mohojë të drejtën e votës.

Përbën kjo një shkelje shumë të rëndë, shumë të madhe, përjashtimi i 1 milion shqiptarëve vetëm se nuk kanë dokument shqiptar, është i padëgjuar ndonjëherë.