Kryetari i Partisë Demokratike, Sali Berisha, ka dalë sot në një konferencë për mediat pas qartësimit të rezultatit të votimit në zgjedhjet parlamentare të 11 Majit, ku ka deklaruar se procesi zgjedhor është vjedhur dhe ka njoftuar një protestë të madhe të opozitës që do të mbahet në ditën e Samitit të BE-së në Tiranë. Në përgjigje të interesit të gazetarëve, Berisha mohoi se planifikon dorëheqjen nga drejtimi i PD, pas humbjes në zgjedhje.
Denoncimet për zgjedhjet
Berisha e cilësoi procesin zgjedhor të 11 Majit si “zgjedhjet më të grabitura, më të plaçkitura dhe më të dhunuara në tërë historinë elektorale të Shqipërisë pluraliste”. Sipas tij, zgjedhjet “u diktuan që të gjitha nga krimi”. Ai deklaroi se banda kriminale të qeverisë ishin “aktive në 10 qarqe të Shqipërisë, në 20 bashki të vendit” dhe “patronuan 30 deputetë të mazhorancës kriminale”.
Si shembull konkret të kësaj, Berisha përmendi “skenat në Vorë, ku banda e Xhabaftit diktoi në mënyrë të dhunshme vullnetin e qytetarëve të Vorës”, duke shtuar se në këto zgjedhje, Blendi Gonxhe të cilin e cilësoi si “kryebanditi Blendi Xhabafti, mori vota dhjetë herë më shumë se kandidati i dytë në lista”. Ai shtoi se skena të ngjashme ishin të zakonshme në një seri qarqesh dhe bashkish të tjerë, si Durrës, Peshkopi, Elbasan, Fier dhe zona të tjera, ku, sipas tij, bandat punonin për deputetë të veçantë. Berisha shkoi më tej duke pretenduar se këto zgjedhje “u sunduan si asnjëherë më parë nga vrasës, seria killera, trafikantë, dhunues, përdhunues”.
Akuzat e Berishës u shtrinë edhe te blerja masive e votës. Ai përmendi si raste “blerjen publike më masive në tërë historinë”, përfshirë “zarfin me 100 euro, i dërguar në mes të fushatës elektorale” dhe “amnistinë prej 200 milionë euro gjoba dhe kamata nga viti 2015 deri në vitin 2025”. Gjithashtu, ai përmendi licencimin e dhjetëra mijëra hektarëve kanabis, fitimi i të cilit sipas tij u përllogarit “për blerje votash në mënyrën më të pamëshirë”, si dhe “punësimi, punë për votë, u aplikua masivisht”.
Berisha denoncoi edhe atë që ai e quajti “sistemi kriminal i patronazhistëve”, të cilin e cilësoi si “një polici terroriste, ndaj zgjedhësve shqiptarë”, e futur “në strofulla ose rreth qendrës së votimit”. Një akuzë tjetër e rëndë ishte ajo ndaj Shërbimit Informativ Kombëtar, ku sipas Berishës, “dy drejtuesit më të lartë… zëvendës të drejtores, u morën javët e para me të gjithë regjistrat e rrjetit agjenturor të Sigurimit të Shtetit dhe e aktivizuan atë për karrigen e Edi Ramës duke shkelur ligj dhe çdo gjë”.
Krimi elektoral, sipas Berishës, ishte “po kaq monstruoz në diasporë”. Ai përmendi si shembull “kutinë e Beratit për diasporën dilte PS 99.6 përqind”, duke e krahasuar këtë me Korenë e Veriut. Ai pretendoi se nga Greqia, pas vizitës së një individi të cilësuar prej tij si “krimineli Balla”, kanë ardhur 6 mijë zarfe “të gjitha të manipuluara”.
Në këtë kontekst, Berisha u bëri thirrje të gjithë komisionerëve të opozitës që, pavarësisht punës me vetëmohim, “të numërojnë çdo votë në dëshmi të respektit tonë të palëkundur ndaj atyre që në kushte terrori kanë votuar për opozitën” dhe “të regjistrojnë dhe të mbajnë shënim çdo parregullsi”.
Protesta
Pika kulmore e deklaratës së Berishës ishte njoftimi për protestën. Ai tha se “libri i zi i këtyre zgjedhjeve shkruhet me datën 16 në ora 17:00 në Bulevardin e Parë”. Qëllimi i kësaj proteste, sipas Berishës, është “të sensibilizojë opinionin publik botëror mbi krimet monstruoze të përbindëshit elektoral Edi Rama, që nuk respekton asnjë rregull, asnjë ligj kombëtar dhe ndërkombëtar për zgjedhjet”.
Berisha theksoi se protesta “do të jetë paqësore”. Ai garantoi se “nuk do ketë probleme që të cenojnë në shkallën më të vogël sigurinë e dinjitarëve që vijnë”, duke iu referuar me gjasa pjesëmarrësve në Samitin e BE-së. Megjithatë, ai bëri të qartë se mesazhi për ta është se “kanë qenë të ftuar nga një narkodiktator që nuk njeh ligj as moral për votën dhe vullnetin e qytetarëve të tij”. Berisha e cilësoi këtë si “fillimi i një beteje që s’ndalet më”.
A do largohet Berisha nga drejtimi i PD?
Kryedemokrati Berisha la të kuptohet se nuk do të japë dorëheqjen nga drejtimi i Partisë Demokratike pas humbjes në zgjedhje.
Në konferencën për median, Berisha u pyet nëse “betejën e votës së lirë të shqiptarëve” ai do e udhëheqë vetë në krye të PD-së apo do ketë një lidership të ri.
Në përgjigje, ai konfirmoi se nuk po planifikon dorëheqjen nga posti i kryetarit të PD.
“Këtë betejë kush e nisi do e bitisi”, tha ai.
Discussion about this post