Kryetari i Partisë Demokratike, Sali Berisha, është paraqitur ditën e sotme në Prokurorinë e Posaçme, në zbatim të masës ‘detyrim paraqitje’ të vendosur ndaj tij.
Pas daljes nga SPAK, Berisha lexoi edhe një mesazh, që sipas tij, ia la në tavolinë kreut të Prokurorisë së Posaçme, Altin Dumanit, shkruan A2 CNN.
Në mesazhin e tij, Berisha shprehet se Altin Dumani është delikuenti numër 2 për kriminalitetin në Shqipëri, pas kryeministrit Edi Rama.
Pjesë nga fjala e Berishës pas daljes nga SPAK:
Dedikasa që unë i lashë aty Altin Troplinit është kjo që vijon:
Altin Troplini me mbrojtjen që u bën karteleve të drogës në Shqipëri, krimeve zgjedhore dhe krimeve të rënda mjedisore, këto dy të fundit fund e krye qeveritare, dëshmon se pas Ramaduros është de facto përgjegjësi më kryesor, delinkuenti numër 2 për kriminalitetin në Shqipëri.
Kjo, u la në këtë prokurori.
Lideri demokrat foli edhe për zjarrin tek landfilli i inceneratorit të Elbasanit, ku tha se ky krim mjedisor nuk ekziston për Altin Dumanin. Ai e quajti më tej Dumanin si një peng të verbër të Edi Ramës dhe Ulsi Manjës.
“Tani, siç jeni informuar për 6 ditë me radhë, qytetarët e Elbasanit pësuan agresionin toksik më të madh në historinë e atij qyteti. Ky krim i rëndë mjedisor, sikundër krimi i rëndë ciklik mjedisor në Vlorë, nuk ekziston për Altin Troplinin, paçka se ligji, krimet mjedisore ia kërkon këtij institucioni sepse i ka shpallur krime të rënda. Pra, ky mercenar i Edi Ramës, ka vendosur institucionin në funksion fund e krye të partisë së krimit dhe të qeveritarëve të krimit. Të digjen fusha e plehrave në Vlorë çdo 3 muaj, të marrin vlonjatët gjer dhe dioksinë mund të ketë në ato plehra dhe mund të krijohet nga djegia. Pa diskutuar pastaj efektet e mirëfillta kancerogjene nga djegiet, të gjitha këto nuk ekzistojnë sepse ky është një peng i verbër i Edi Ramës dhe Ulsi Manjës.” – tha Berisha.
Discussion about this post