Me anë të një postimi në Facebook, Sekretari i Përgjithshëm i Partisë Demokratike, Gazment Bardhi shkruan se ish-kryeministri Berisha me sulmet që po i bën selisë blu po demaskon veten e tij dhe se nuk i interesin fitorja e PD-së në zgjedhjet e 6 marsit. Ai thotë se Berisha nuk lë gjë pa thënë për Partinë Demokratike, por nuk artikulon asnjë fjalë ndaj kryeministrit Rama dhe kandidatëve të tij.
“Sali Berisha po demaskon veten dita ditës duke sulmuar vetëm Partinë Demokratike dhe demokratët. Asnjë fjalë për kandidatët e Partisë Socialiste në zgjedhjet e 6 Marsit. Vetëm fyerje, sharje, shpifje dhe intimidim për kandidatët e Partisë Demokratike” – shkruan Bardhi në rrjetin e tij social në Facebook.
Më tej Bardhi shprehet se Berisha betejën e ka me PD-në dhe demokratët dhe jo me regjimin e Edi Ramës dhe se i intereson vetëm të furnizojë me “karburant” revolucionin e tij imagjinar bashkë me Ilir Metën kundër SHBA.
“Betejën e ka me PD dhe demokratët, jo me regjimin e Edi Ramës. Këtë metodë ka futur edhe tek ato pak njerëz që i shkojnë nga pas në 6 bashkitë. Nuk i interesojnë demokratët, nuk u intereson fitorja e tyre, i intereson vetëm të furnizojë me “karburant” revolucionin e tij imagjinar bashkë me Ilir Metën kundër SHBA. Çdo votë për “Shtëpinë e Ilirit” është votë kundër demokratëve, kundër PD, dhe votë që fuqizon pushtetin e Edi Ramës” – shkruan Bardhi.
Kujtojmë se ditën e sotme ish-kryeministri Sali Berisha ka hedhur sërish akuza ndaj kryetarit të Partisë Demokratike, Lulzim Basha, gjatë prezantimit të kandidatit të tij në qytetin e Dibrës.
Discussion about this post