‘Rama sot ekzekuton 15 bashki për karrigen e tij’, Berisha: Të gjithë bashkë në protestë para Parlamentit!

Kreu i Partisë Demokratike, Sali Berisha, nëpërmjet një mesazhi në rrjetet sociale ka përsëritut thirrjen e tij për protestën tek Kuvendi. Në reagimin e tij, Berisha thekson se Kryeministri Edi Rama do të votojë sot ndarjen e re territoriale vetëm për interesat e tij.

“Edi Rama sot ekzekuton 15 bashki për karrigen e tij! Ora 10:00, të gjithë bashkë në protestë para Parlamentit! Përtej çdo bindjeje politike, t’i dalim zot interesit qytetar!” shkruan Berisha.

Berisha garantoi se nga radhët e opozitës nuk do të ketë asnjë rrjedhje votash sa i takon votimit të draftit të PS për reformën territoriale.

“Zero rrjedhje” tha Berisha kur u pyet nga gazetarët në selinë blu.

Ndërkohë i pyetur në lidhjen me skenarin e opozitës për protestën e sotme, Berisha tha se do të bëjnë betejën më të madhe që kanë bërë ndonjëherë.

“Protesta do jetë, ne do qëndrojmë brenda, protesta do jetë jashtë, ne do bëjmë një beteje më të madhe që kemi bërë ndonjëherë”, tha Berisha.

Për ta kaluar projektligjin, nevojiten 84 vota, të cilat socialistët rrezikojnë të mos i plotësojnë,pasi dy prej ligjvënësve, Vullnet Sinaj dhe Erion Braçe e kanë kundërshtuar ndarjen e re.

Edhe deputetja e pavarur Marjana Koçeku ka deklaruar votën kundër draftit të PS-së. Për të plotësuar numrin e nevojshëm të votave, në seancë pritet të jenë edhe kryeministri Edi Rama, me mungesa të konsiderueshme këto kohë në sallën plenare.

Përveç seancës plenare në orën 10:00 dhe protestës që Berisha ka paralajmëruar, mbahet edhe protesta e qytetarëve që e ka njoftuar prej ditësh.