Kryetari i Partisë Demokratike, Sali Berisha, akuzoi kryeministrin Edi Rama dhe Lubia për një aferë me aeroportin e Vlorës, duke pretenduar se synojnë të përfitojnë 130 milionë euro.
Në një konferencë për shtyp, Berisha deklaroi se aeroporti nuk duhej të ndërtohej në zonën aktuale, pasi sipas tij dëmton habitatin e flamingove dhe shpendëve të tjerë. Ai tha se PD kishte propozuar ndërtimin e aeroportit në kthesën e Levanit, ndërsa kritikoi vendimin për ta ndërtuar në vendndodhjen aktuale.
Berisha akuzoi gjithashtu Ramën dhe Lubian se janë të lidhur me këtë aferë dhe deklaroi se “të dy do shkojnë bashkë aty ku e meritojnë”.
“Aeroporti i Vlorës nuk duhej të ndërtohej kurrë aty, se aeroporti i Vlorës shkatërron përfundimisht habitatin e zogjve, e flamingove dhe zogjve të tjerë të asaj zone.
Prandaj edhe ne e spostuam, do e ndërtonim tek kthesa e Levanit.
I njëjti grup që na tha ne se nuk mund të ndërtohet aty për shkak të flamingove dhe zonës, i njëjti grup i tha edhe Edi Ramës në vitin 2017.
Jo, i thanë, nuk ndërtohet këtu.
Këta e ndërtuan.
Ku mund të pengoheshin ata para 130 milionë vjedhje së bashku.
Prandaj dhe ajo e merr çdo javë dhe i thotë 60 përqind je ti në dosjet e mia.
Absolutisht!
Dhe ky sillet si Konstandini me Dhoqinën, keni parë, nuk keni parë, shkon një i vdekur me të gjallë. E thotë populli.
Nuk e lëshon Dhoqina këtë.
Harrojeni.
Jo, nuk e lëshon.
Të dy do shkojnë bashkë aty ku e meritojnë”, u shpreh ai.
Berisha u ndal edhe tek aeroporti i Kukësit, duke hedhur akuza ndaj ish zv kryeministres, Belinda Balluku.
Sipas Berishës, sot aeroportit të Kukësit i kanë rënë aksionet, ndërsa ironizon Ballukun, e cila e inauguronte duke zbritur aty me helikopter.
Berisha e konsideroi Ballukun si “monstër të korrupsionit”, duke shtuar se ajo “mbahet dhe mbrohet me 83 mandate të krimit”.
“Shkoni pak në Aeroportin e Kukësit. Ju kujtohet kur zbarkonte Lubia me helikopter. Tregojani shqiptarëve të shohin monstrën, si i mashtronte.
Erdha thoshte se duhet të bëj një provë para se të vijë avioni me qindra cuna nga Londra dhe shkoi të bëjë provën kjo pilotja, një monstër e vërtetë.
Ku është sot aeroporti i Kukësit sot?
Aeroporti i Kukësit, dikush më thotë se po shndërrohet në termocentral me panele diellore. Pra loja me aeroportet e Ramës dhe Lubisë është një lojë e turpshme, me pasoja financiare shumë të rënda.
Shkoi atje, e inauguroi aeroportin e Kukësit ajo, zbriti me helikopter. Nxirrjani të shohin atë faqezeze që mbrohet nga 83 mandate krimi. Nxirrjani pak ta shohin shqiptarët edhe njëherë monstran e korrupsionit. Tani ku është aeroporti? Tani i ranë aksionet”, deklaroi Sali Berisha.
Discussion about this post