Ish-kryeministri dhe kreu i Partisë Demokratike, Sali Berisha, ka reaguar pas zhvillimeve të fundit lidhur me rikthimin e Belinda Ballukut në detyrën e zv.kryeministres dhe ministres së Infrastrukturës.
Sipas Berishës, për herë të parë në 32 vite, kryeministri Edi Rama ka kaluar në një sulm të hapur kundër ndëshkimit të korrupsionit, duke u bërë “njësh me Ballukun” për të mbrojtur interesat e tij. Ai e cilësoi këtë akt si të pashembullt për një vend që aspiron integrimin europian, duke theksuar se nuk ka ndodhur kurrë në Shqipëri dhe është një precedent negativ për drejtësinë.
Berisha kritikoi ashpër argumentimin e shumicës në vendimin e fundit të Gjykatës Kushtetuese, të cilin e konsideroi si identik me deklaratat e kryeavokatit Rama, duke theksuar se anulimi i pezullimit të Ballukut është bërë për të mbrojtur qeverinë dhe paratë e kryeministrit.
Ai gjithashtu u shpreh se qeveria nuk mund të paralizohet nga pezullimi i një zëvendëskryeministri, duke ironizuar pretendimet se kjo situatë ndikonte në funksionimin e qeverisë. Berisha rikujtoi shembuj nga e kaluara, kur ministra të tjerë dhanë dorëheqje për të lejuar hetimet, ndërsa sipas tij Rama ka bllokuar hetimet për korrupsion dhe drogë gjatë gjithë periudhës së tij në pushtet.
“Tani Rama është një me Belinda Ballukun dhe triumfoi në çdo gjë që diktoi gjatë këtyre tre javëve. Gjë më absurde nuk mund të kishte, kur pretendon se pezullimi i Ballukut shkel Kushtetutën apo paralizon qeverinë, ndërkohë që ai vetë ka përfituar më shumë se Balluku në të njëjtat raste,” deklaroi Berisha.
Discussion about this post